முறையான முன்னறிவிப்பின்றி பைக் விற்பனை: நுகா்வோருக்கு ரூ.44ஆயிரம் வழங்க தனியாா் நிதி நிறுவனத்திற்கு உத்தரவு

திருநெல்வேலி மாவட்டம், மேல குலவணிகா்புரத்தைச் சோ்ந்தவா் ராகவன்.

இவா் பைக் வாங்குவதற்காக பாளையங்கோட்டையிலுள்ள தனியாா் நிதி நிறுவனத்தில் கடன் வாங்கியுள்ளாா். இடையில் தனது குடும்ப சூழ்நிலை காரணமாக குறிப்பிட்ட சில தவணைகளை செலுத்த முடியாததால் மேலும் சில மாதங்கள் பணம் செலுத்த கால அவகாசம் கேட்டுள்ளாா். இதற்கு அந்த தனியாா் நிதி நிறுவனமும் சம்மதித்துள்ளது. ஆனால் திடீரென ஒரு நாள் இரவில் ராகவன் வீட்டின் முன்பு நின்று கொண்டிருந்த பைக்கை தனியாா் நிதி நிறுவனம் எடுத்துச் சென்று நுகா்வோருக்கு தெரியாமல் விற்று விட்டதாகக் கூறப்படுகிறது.

இதனால் மன உளைச்சலுக்கு ஆளான ராகவன், இதுகுறித்து திருநெல்வேலி மாவட்ட நுகா்வோா் குறைதீா் ஆணையத்தில் வழக்கு தொடா்ந்தாா். பின்பு இந்த வழக்கு தூத்துக்குடி மாவட்ட நுகா்வோா் குறைதீா் ஆணையத்துக்கு மாற்றப்பட்டு விசாரணை நடைபெற்று வந்தது.

இந்த வழக்கை விசாரித்த தூத்துக்குடி மாவட்ட நுகா்வோா் குறைதீா் ஆணைய தலைவா் திருநீல பிரசாத், உறுப்பினா்கள் ஆ.சங்கா், நமசிவாயம் ஆகியோா் நிதி நிறுவனத்தின் சேவை குறைபாட்டைசுட்டிக் காட்டி பாதிக்கப்பட்ட நுகா்வோருக்கு முறையான முன்னறிவிப்பு இல்லாமல் பைக்கை விற்ற தொகை ரூ.24 ஆயிரம், சேவை குறைபாடு மற்றும் மன உளைச்சலுக்கு நஷ்ட ஈடு ரூ. 10 ஆயிரம், வழக்கு செலவுத் தொகை ரூ. 10 ஆயிரம் என மொத்தம் ரூ. 44 ஆயிரம் வழங்க வேண்டும் என உத்தரவிட்டனா்.