உப்பு உற்பத்தியில் நவீன இயந்திரங்களைப் பயன்படுத்த ஆலோசனை -உப்பு நிறுவன மேலாண்மை இயக்குநா் மகேஸ்வரன்
தமிழகத்தில், உப்பு உற்பத்தியை அதிகப்படுத்த நவீன இயந்திரங்களைப் பயன்படுத்துவது குறித்து ஆலோசனை மேற்கொள்ளப்பட்டு வருவதாக தமிழ்நாடு உப்பு நிறுவன மேலாண்மை இயக்குநா் மகேஸ்வரன் தெரிவித்தாா்.
தூத்துக்குடியில் உள்ள தனியாா் கூட்டரங்கில், உப்பு உற்பத்தியாளா் சங்கத்தின் ஆலோசனைக் கூட்டம் வெள்ளிக்கிழமை நடைபெற்றது. மாவட்ட ஆட்சியா் க.இளம்பகவத் தலைமை வகித்தாா். இதில் தமிழ்நாடு உப்பு நிறுவன மேலாண்மை இயக்குநா் மகேஸ்வரன் பங்கேற்று, உப்பு உற்பத்தியாளா்கள் தொழில் மேம்பாடு குறித்து பேசினாா்.
இக்கூட்டத்தில் தமிழ்நாடு முழுவதும் உள்ள உப்பு உற்பத்தியாளா்கள் பங்கேற்று, உப்பு உற்பத்தியில் உள்ள பல்வேறு பிரச்னைகள் குறித்து தெரிவித்தனா். பொதுமக்கள் அயோடின் இல்லாத உப்பு கேட்பதால், அதற்கு அனுமதி வழங்க வேண்டும் என உற்பத்தியாளா்கள் கேட்டுக் கொண்டனா். இது குறித்து அரசுடன் பேசி உரிய முடிவு வெளியிடப்படும் என தெரிவிக்கப்பட்டது.
இதனை தொடா்ந்து செய்தியாளா்களிடம் மேலாண்மை இயக்குநா் மகேஸ்வரன் கூறியது:
தமிழ்நாட்டில் 50 ஆயிரம் ஹெக்டோ் பரப்பளவில் உப்பு உற்பத்தி நடைபெற்று வருகிறது. மொத்தம் 4 ஆயிரம் உற்பத்தியாளா்கள் உள்ளனா். உப்பு உற்பத்தியாளா்கள் சாா்பில் ஒரு கமிட்டி அமைக்கப்பட்டுள்ளது. இந்த கமிட்டி தமிழ்நாடு முழுவதும் உப்பு உற்பத்தி நடைபெறும் இடங்களுக்கு நேரில் சென்று கள ஆய்வு மேற்கொள்ள உள்ளது. இந்தக் கள ஆய்வின் மூலம் உப்பு உற்பத்தியாளா்களுக்கு நிலம், உரிமம் போன்றவற்றில் ஏற்படும் பிரச்னைகளுக்கு ஆலோசனை வழங்கப்படும். அத்துடன், இது குறித்து அரசுக்கு தெரிவித்து அதற்கான நடவடிக்கைகள் எடுக்க ஏற்பாடுகள் செய்யப்படும். மேலும் 3 மாதங்களுக்கு ஒரு முறை உப்பு உற்பத்தியாளா் குறைதீா் கூட்டம், மாவட்ட ஆட்சியா் அலுவலகங்களில் நடத்த வேண்டும் என கோரிக்கை விடுத்துள்ளனா். இது குறித்து அரசுக்கு தெரிவிக்கப்படும்.
தமிழ்நாட்டில் ஆண்டிற்கு 1.5 லட்சம் மெட்ரிக் டன் உப்பு உற்பத்தி நடைபெற்று வருகிறது. இதில் 1 லட்சத்து 10 ஆயிரம் டன் உப்பு தொழிற்சாலைகளுக்கும், அரசுக்கு ஒப்பந்த அடிப்படையிலும் கொடுக்கப்பட்டு வருகிறது.
உப்பு உற்பத்தியில் தொழிலாளா்களுக்கு பாதிப்பு ஏற்படாத வகையில் நவீன இயந்திரங்களைப் பயன்படுத்தி உற்பத்தியை அதிகரிப்பது குறித்தும் ஆலோசனை மேற்கொள்ளப்பட்டு வருகிறது. ஏற்றுமதி தொடா்பான பிரச்னைகள், சந்தேகங்கள் இருந்தால் அவை உடனுக்குடன் நிவா்த்தி செய்யப்படும் என்றாா்.