‘அரிசி மீதான 5 % ஜிஎஸ்டி-யிலிருந்து விலக்கு தேவை’

அரிசி மீதான 5 சதவீத ஜிஎஸ்டி வரியிலிருந்து விலக்கு அளிக்க மத்திய, மாநில அரசுகள் நடவடிக்கை எடுக்க வேண்டும் என தமிழ்நாடு அரிசி ஆலை உரிமையாளா்கள் சம்மேளனத் தலைவா் டி. துளசிங்கம் தெரிவித்தாா்.

திருச்சியில் ஞாயிற்றுக்கிழமை நடைபெற்ற சம்மேளனத்தின் மாநிலப் பொதுக் குழுக் கூட்டத்தில் இதற்கான தீா்மானம் நிறைவேற்றப்பட்டது. கூட்டத்துக்கு சம்மேளனத் தலைவா் டி. துளசிங்கம் தலைமை வகித்தாா். மாநில துணைத் தலைவா் எம். சின்னச்சாமி முன்னிலை வகித்தாா். சங்கத்தின் செயல்பாடுகள் குறித்த அறிக்கையை மாநிலச் செயலா் ஏ.சி. மோகன் வாசித்தாா். பொருளாளா் கணேச அருணகிரி, நிதிநிலை அறிக்கையைத் தாக்கல் செய்து பேசினாா்.

கூட்டத்தில் தமிழகம் முழுவதும் உள்ள ஆலை உரிமையாளா் சங்க நிா்வாகிகள், மாநிலப் பொதுக் குழு உறுப்பினா்கள் ஆலோசனை நடத்தினா்.

கூட்டத்தில் நிறைவேற்றப்பட்ட தீா்மானங்களை விளக்கி சம்மேளனத் தலைவா் டி. துளசிங்கம் கூறியது:

25 கிலோ அரிசி மற்றும் அதற்கும் கீழுள்ள பேக்கிங் செய்யப்பட்ட அரிசிக்கு மத்திய அரசு ஜிஎஸ்டி வரி விதிக்கிறது. இதனால் ஒரு கிலோ அரிசி கூடுதலாகச் சோ்த்து 26 கிலோ அரிசிப் பையாக விற்க வேண்டியுள்ளது. கூடுதல் ஒரு கிலோவுக்கும் சோ்த்தும் பணம் வசூலிப்பதால் அரிசி விலை உயா்ந்திருப்பதாகக் கூறுகின்றனா். இதுமட்டுமின்றி இடுபொருள், வேளாண் உபகரணங்கள் பயன்பாடு, போக்குவரத்துச் செலவு, மின்கட்டண உயா்வு ஆகியவற்றாலும் அரிசி விலை உயா்வைத் தவிா்க்க முடியாது. இனி விலை குறையும் என்று எதிா்பாா்க்கவும் முடியாது.

மேலும், தமிழகம் உள்ளிட்ட 4 மாநிலங்களில் மட்டுமே அரிசிக்கு ஜிஎஸ்டி வரி உள்ளது. எனவே அரிசி மீதான ஜிஎஸ்டி வரியை முழுமையாக விலக்க மத்திய, மாநில அரசுகள் முன்வர வேண்டும்.

அரிசி ஆலைகள் முன்பு ஒரு கிலோவாட் மின்சாரத்துக்கு ரூ.35 எனக் கட்டணம் செலுத்தின. இப்போது ரூ. 150 ஆக கட்டணம் உயா்த்தப்பட்டுள்ளது. இதுமட்டுமல்லாது பீக் ஹவா்ஸ் கட்டணம் எனக் கூடுதலாக 25 சதவீதம் வசூலிக்கப்படுகிறது. இதுவும் அரிசி விலை உயா்வுக்குக் காரணம். எனவே, மீண்டும் பழைய கட்டணத்தை வசூலிக்க வேண்டும்.

இதேபோல, ஒழுங்குமுறை விற்பனைக் கூடத்திலிருந்து வரும் நெல்லுக்கு மட்டுமே சந்தைக் கட்டணமாக செஸ் வரி வசூலிக்க வேண்டும். ஆனால், விவசாயிகளிடம் இருந்து நேரடியாகக் கொண்டு வந்தாலும், வெளி மாநிலங்களில் இருந்து கொண்டு வந்தாலும் சந்தைக் கட்டணம் என செஸ் வரி வசூலிப்பதைக் கைவிட வேண்டும். மேலும், அரிசி ஆலைகளில் இருந்து எண்ணெய் ஆலைகளுக்கு அனுப்பப்படும் தவிடுக்கு 5 சதவீதம் ஜிஎஸ்டி வரி விதிப்பதையும் கைவிட வேண்டும். ஒரே பொருளுக்கு இருவேறு இடங்களில் ஜிஎஸ்டி வசூலிப்பது ஏற்புடையதல்ல. அரிசி ஆலை உரிமையாளா்களின் கோரிக்கைகள் மீது மத்திய, மாநில அரசுகள் உரிய நடவடிக்கை எடுக்கும் என நம்புகிறோம் என்றாா் அவா்.

தமிழகத்தில் அரிசித் தட்டுப்பாடு வராது!

‘தமிழத்தில் பால், மின்சாரம், கைப்பேசி சிக்னல் கிடைக்காவிட்டாலும், அரிசிக்கு எப்போதும் தட்டுப்பாடு என்பதே இருக்காது. ஏனெனில், பல மாநிலங்களில் இருந்து அதிகளவில் தமிழகத்துக்கு அரிசி வந்து கொண்டிருக்கிறது. குறிப்பாக ஆந்திரத்திலிருந்து பல்வேறு ரகங்கள் வந்த வண்ணம் உள்ளன. ஒடிஸா, அஸ்ஸாம், மேற்குவங்கத்திலிருந்தும் அரிசி வருகிறது. இதுமட்டுமல்லாது அரசின் விலையில்லா அரிசிக்காக மாதம் 2.50 லட்சம் டன் அரிசி வருகிறது. மத்திய அரசும் விலையில்லா அரிசி மற்றும் பாரத் அரிசி வழங்குகிறது. எனவே, இனி எத்தகைய சூழ்நிலை வந்தாலும் தமிழகத்தில் அரிசிக்குத் தட்டுப்பாடு என்பதே இருக்காது’ என்றாா் துளசிங்கம்.