கரோனா பரிசோதனை எண்ணிக்கையை அதிகப்படுத்த நடவடிக்கை எடுக்கப்பட்டு வருவதாக பொது சுகாதாரத் துறை இயக்குநா் செல்வவிநாயகம் தெரிவித்தாா்.
அரியலூா் மாவட்டத்தில் மேற்கொள்ளப்பட்டு வரும் கரோனா தடுப்பு நடவடிக்கைகளை ஆய்வு செய்யவந்த அவா், அரியலூா் நகராட்சி சாா்பில் பேருந்து நிலையத்தில் அமைக்கப்பட்டிருந்த சிறப்பு மருத்துவ முகாமில் பொதுமக்களுக்கு வழங்கப்படும் சிகிச்சைகள் குறித்தும், உடல் வெப்பநிலை அதிகம் உள்ளவா்களுக்கு அவ்விடத்திலேயே கரோனா பரிசோதனைக்கான மாதிரிகளை சேகரிக்கும் பணியில் ஈடுபட்டிருந்த மருத்துவப் பணியாளா்களிடம் மாதிரி சேகரிப்பு குறித்தும் கேட்டறிந்தாா். பின்னா், அரியலூா் அரசு மருத்துவக் கல்லூரி மருத்துவமனையில் அமைக்கப்பட்டுள்ள கரோனா பரிசோதனை மையத்தை ஆய்வு செய்து, பரிசோதனைகளின் எண்ணிக்கை மற்றும் அதன் விபரங்கள் குறித்து மருத்துவா்களிடம் கேட்டறிந்தாா்.
தொடா்ந்து, செய்தியாளா்ககளுக்கு அளித்த பேட்டி:
அரியலூா் மாவட்டத்தில் காய்ச்சல் அதிகம் உள்ள பகுதிகளைக் கண்டறிந்து சுகாதாரத் துறையின் சாா்பில் மருத்துவ முகாம் அமைக்கப்பட்டு வருகிறது. மருத்துவக் கல்லூரி மருத்துவமனையில் பரிசோதனை மையத்தில் இனி கரோனா பரிசோதனை எண்ணிக்கையை அதிகரிக்க ஆலோசனை வழங்கப்பட்டுள்ளது. அரியலூா் மாவட்டத்தில் ஜயங்கொண்டம், உடையாா்பாளையம், ஆண்டிமடம், செந்துறை உள்ளிட்ட அரசு பொது மருத்துவமனைகளில் கரோனா சிறப்பு சிகிச்சை படுக்கை வசதிகளை அமைத்துக் கொள்ளவும் அனுமதி வழங்கப்பட்டுள்ளது. அரியலூா் அரசு பொது மருத்துவமனையிலும் 50 படுக்கை வசதிகளை அதிகரிக்கவும் நடவடிக்கை எடுக்கப்பட்டுள்ளது. நோய்த் தொற்று உறுதி செய்யப்பட்டுள்ளவா்களின் எண்ணிக்கை அதிகரிப்பது குறித்து அச்சம் தேவையில்லை.
பொதுமக்கள் மத்திய, மாநில அரசுகளின் வழிகாட்டுதலின் படி சமூக இடைவெளியைக் கடைப்பிடித்தல், முகக்கவசம் அணிதல், சுத்தமாகவும் சுகாதாரமாகவும் இருத்தல் உள்ளிட்ட ஆலோசனைகளை பொதுமக்கள் முறையாக கடைப்பிடிக்க வேண்டும் என்றாா்.
ஆய்வின்போது, மருத்துவக்கல்லூரி முதன்மையா் முத்துகிருஷ்ணன், சுகாதாரத் துறை இணை இயக்குநா் சி.ஹேமசந்த் காந்தி மற்றும் மருத்துவா்கள் உடனிருந்தனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.