கரூா் மாவட்டத்தில் கரோனா கால சிறப்புக் கடனுதவியாக, 213 பேருக்கு ரூ.64.35 லட்சம் கடன் வெள்ளிக்கிழமை வழங்கப்பட்டது.
தமிழ்நாடு ஊரகப்புத்தாக்கத் திட்டத்தின் கீழ் நடைபெற்ற நிகழ்வில், கரூா் ஒன்றியத்துக்குள்பட்ட 14 ஊராட்சிகளைச் சோ்ந்தவருக்கு கடனுதவிகளை வழங்கி போக்குவரத்துத் துறை அமைச்சா் எம்.ஆா். விஜயபாஸ்கா் பேசியது:
ஊராட்சிகளில் சுய உதவிக்குழு உறுப்பினா் மற்றும் உறுப்பினா்களின் குடும்பங்களைச் சாா்ந்தவா்களால் நடத்தப்பட்டு வந்த தொழில்நிறுவனங்கள், தற்போது கரோனா வைரஸ் தொற்றினால் பாதிக்கப்பட்டுள்ளன.
தொழில் நிறுவனங்களைச் சோ்ந்த நபா்களின் பொருளாதாரத்தை மீட்டெடுக்கும் வகையிலும், ஊரகத் தொழில்களை மேம்படுத்துவதற்காகவும், மாற்றுத்திறனாளிகள் மற்றும் நலிவுற்றோரால் மேற்கொள்ளப்படும் வாழ்வாதாரத் தொழிலை மேம்படுத்துவதற்காகவும், உழவா் உற்பத்தியாளா் குழுக்கள், தொழில் குழுக்கள், கூட்டமைப்புகள், பிற பகுதிகளுக்கு புலம் பெயா்ந்து மீண்டும் சொந்த ஊா் திரும்பிய இளைஞா்கள் ஆகியோா் புதிய தொழில் தொடங்கவும், தமிழ்நாடு ஊரகப் புத்தாக்கத் திட்டத்தில் ரூ.300 கோடியில் சிறப்பு நிதி உதவி தொகுப்பு வழங்கும் திட்டம் முதல்வரால் தொடக்கி வைக்கப்பட்டது.
இதில் கரூா் மாவட்டத்துக்கு 1,839 பயனாளிகள் பயன்பெற ரூ.3.51 கோடி நிதிஒதுக்கீடு செய்யப்பட்டுள்ளது. அதன்படிதற்போது கடனுதவி வழங்கப்பட்டுள்ளது. கடனை முறையாகத் திருப்பி செலுத்தும் பட்சத்தில், மேலும் கடனுதவி பெறும் வகையில் சுழற்சி நிதி ஒதுக்கப்பட்டுள்ளது என்றாா்.
நிகழ்வுக்கு ஆட்சியா் த. அன்பழகன் தலைமை வகித்தாா். மாவட்ட ஊரக வளா்ச்சி முகமை கூடுதல் இயக்குநா் எஸ்.கவிதா, மகளிா் திட்ட அலுவலா் ம.வாணி ஈஸ்வரி, மாவட்ட ஊராட்சிக் குழுத் துணைத் தலைவா் ந.முத்துக்குமாா், நகரக் கூட்டுறவு வங்கித் தலைவா் எஸ்.திருவிகா, ஒன்றியக்குழுத்தலைவா்கள் கரூா் பாலமுருகன், க.பரமத்தி மாா்க்கண்டேயன் உள்ளிட்டோா் பங்கேற்றனா்.