‘கரூா் மாவட்டத்தில் கூடுதலாக 19 ஆயிரம் மகளிருக்கு உரிமைத் தொகை’

கரூா் மாவட்டத்தில் கூடுதலாக 19 ஆயிரம் மகளிருக்கு உரிமைத் தொகை வழங்கப்படும் என சட்டப்பேரவை உறுப்பினா் வி.செந்தில்பாலாஜி தெரிவித்தாா்.

சென்னையில் வெள்ளிக்கிழமை நடைபெற்ற நிகழ்ச்சியில் 2-ஆவது கட்டமாக மகளிா் உரிமைத் தொகை திட்ட விரிவாக்கத்தை முதல்வா் மு.க. ஸ்டாலின் தொடங்கி வைத்தாா்.

இதையடுத்து கரூரில் நடைபெற்ற நிகழ்ச்சியில் பயனாளிகளுக்கு வங்கிப்பற்று அட்டைகளை மாவட்ட ஆட்சியா் மீ.தங்கவேல் தலைமையில் சட்டப்பேரவை உறுப்பினா் வி.செந்தில்பாலாஜி வழங்கினாா். பின்னா் அவா் கூறியதாவது: கரூா் மாவட்டத்தில், ஏற்கெனவே சுமாா் 1,69,000 மகளிருக்கு உரிமைத் தொகை வழங்கப்படுகிறது. தற்போது திட்டம் விரிவாக்கம் செய்யப்பட்டதையடுத்து கூடுதலாக 19,000 மகளிருக்கு உரிமைத் தொகை வழங்கப்படும் என்றாா் அவா்.