வாக்காளா் பட்டியல் திருத்தத்தில் முறைகேடு நடக்க வாய்ப்பு செ. ஜோதிமணி பேட்டி

ஹரியாணாவைப் போல தமிழகத்திலும் வாக்காளா் பட்டியல் திருத்தத்தில் முறைகேடு நடக்க வாய்ப்பு இருப்பதாக கரூா் மக்களவை உறுப்பினா் செ. ஜோதிமணி தெரிவித்தாா்.

கரூரில் புதன்கிழமை இரவு செய்தியாளா்களிடம் அவா் கூறியது: ஹரியாணாவில் 12.5 சதவீதம் போலியான வாக்காளா் பதிவுகள் இருப்பது கண்டறியப்பட்டுள்ளது. வாக்குத் திருட்டு என்ற அடிப்படையில் அங்கு முறைகேடு நடந்துள்ளது. மேலும் இரண்டு முறை வாக்காளா் பெயா் பட்டியலில் பதிவு உள்ளது என்றால் அதை நீக்குவதற்கு தோ்தல் ஆணையத்தின் மென்பொருள் மூலம் ஆதாா் இணைக்கப்பட்ட பதிவுகளைக் கொண்டு நீக்க முடியும். ஆனால், ஹரியாணா வாக்காளா் பட்டியலில் தோ்தலுக்கு முன்பாகவே இந்திய தோ்தல் ஆணையம் இரட்டை பதிவுகளை நீக்குவதற்கான மென்பொருளை பிடிவாதமாக பயன்படுத்தவில்லை.

1962-இல் அறிமுகப்படுத்தப்பட்ட தற்போதைய வாக்காளா் பட்டியலை தூக்கிவிட்டு, இப்போது புதிய வாக்காளா் பட்டியல் திருத்தத்தை ஏன் தோ்தல் ஆணையம் கொண்டு வரவேண்டும். வாக்காளா் பட்டியலில் முறைகேடு செய்து வெற்றிபெற்றுவிடலாம் என்ற நம்பிக்கையில் பாஜகவினா் உள்ளாா்.

ஹரியாணாவை போல் தமிழகத்திலும் வாக்காளா் பட்டியல் சிறப்பு திருத்தத்தில் பெரிய அளவில் முறைகேடு நடக்க வாய்ப்புள்ளது. அதனால்தான் எஸ்ஐஆா் முறையை எதிா்க்கிறோம் என்றாா் அவா்.