புதையல் எடுப்பதாகக் கூறி மோசடி: ஜோதிடா் உள்பட 3 போ் கைது

பெரம்பலூா் அருகே புதையல் எடுப்பதாகக் கூறி வியாபாரியை ஏமாற்றிய ஜோதிடா் உள்பட 3 பேரை போலீஸாா் வியாழக்கிழமை கைது செய்தனா்.

பெரம்பலூா் அருகேயுள்ள விளாமுத்தூா் கிராமத்தைச் சோ்ந்தவா் பிரபு (39). ஐஸ் வியாபாரம் செய்து வந்த இவருக்கு, தொழிலில் பெரும் நஷ்டம் ஏற்பட்டதால் வறுமையால் வாடியதாகக் கூறப்படுகிறது. இதையடுத்து, நண்பா் ஒருவரின் ஆலோசனையின்பேரில், நாமக்கல் மாவட்டம், பரமத்தி வேலூரைச் சோ்ந்த கிருஷ்ணமூா்த்தி என்ற ஜோதிடரை அண்மையில் சந்தித்து வறுமையிலிருந்து மீண்டு, இழந்த பொருள்களை மீட்டு வளமாக வாழ ஆலோசனைக் கேட்டாராம்.

இதைத் தொடா்ந்து, பிரபு வீட்டை கடந்த சில நாள்களுக்கு முன் நேரில் சென்று பாா்வையிட்ட ஜோதிடா், வீட்டில் புதையல் இருப்பதாகவும், அதை எடுக்க பூஜை செய்ய ரூ. 50 ஆயிரம் செலவாகும் எனத் தெரிவித்துள்ளாா்.

இதையடுத்து, ரூ. 5 ஆயிரம் முன்தொகை பெற்றுக்கொண்ட ஜோதிடா் கிருஷ்ணமூா்த்தி, அவரது நண்பா்களான சேலம் மாவட்டம், சங்ககிரியைச் சோ்ந்த வெள்ளியங்கிரி (39), திருச்சி மாவட்டம், துறையூா் அருகேயுள்ள கோட்டாத்தூரைச் சோ்ந்த பிரபாகா் (40) ஆகியோருடன் புதன்கிழமை பிரபு வீட்டுக்குச் சென்று புதையலை எடுப்பதற்காக குழி தோண்டினா். 12 அடி ஆழத்துக்கும் மேலாக குழி தோண்டியும் புதையல் கிடைக்காததால், குழி தோண்டும் பணியை நிறுத்தும்படி பிரபு தெரிவித்துள்ளாா். அதற்கு மறுப்பு தெரிவித்த ஜோதிடா் கிருஷ்ணமூா்த்தி, பேசியபடி ரூ. 50 ஆயிரம் தர வேண்டும், இல்லையெனில் வாய் பேச முடியாதவாறு மாந்திரீகம் செய்துவிடுவேன் என பிரபுவை மிரட்டியுள்ளாா்.

இதனால் அச்சமடைந்த பிரபு, பெரம்பலூா் காவல் நிலையத்தில் வியாழக்கிழமை புகாா் அளித்தாா். இதன்பேரில், போலீஸாா் வழக்குப் பதிந்து கிருஷ்ணமூா்த்தி, வெள்ளியங்கிரி, பிரபாகரன் ஆகியோரை கைது செய்து தீவிர விசாரணை மேற்கொண்டு வருகின்றனா்.