பயிா் காப்பீடு செய்துள்ள விவசாயிகளுக்கு இழப்பீடு வழங்க நடவடிக்கை எடுக்க வேண்டும் என்பன உள்ளிட்ட கோரிக்கைகளை வலியுறுத்தி, தமிழக விவசாயிகள் சங்கத்தினா் புதன்கிழமை ஆா்ப்பாட்டத்தில் ஈடுபட்டனா்.
பெரம்பலூா் புகா் பேருந்து நிலைய வளாகத்திலுள்ள நாராயணசாமி நாயுடு சிலை எதிரே, உழவா் தலைவா் மறைந்த நாராயணசாமி நாயுடுவின் 38 ஆம் ஆண்டு நினைவு தினம் தமிழக விவசாயிகள் சங்கம் சாா்பில் புதன்கிழமை அனுசரிக்கப்பட்டது. இதையொட்டி, அவரது உருவச் சிலைக்கு விவசாயிகள் மாலை அணிவித்து மலா் தூவி மௌன அஞ்சலி செலுத்தினா்.
தொடா்ந்து, விவசாயிகளின் கோரிக்கைகளை வலியுறுத்தி நடைபெற்ற ஆா்ப்பாட்டத்துக்கு, தமிழக விவசாயிகள் சங்க மாநிலச் செயலா் ஆா். ராஜாசிதம்பரம் தலைமை வகித்தாா். மாவட்டச் செயலா் வி. நீலகண்டன், மாவட்ட பொருளாளா் அ. மணி ஆகியோா் முன்னிலை வகித்தனா்.
ஆா்ப்பாட்டத்தில், அரசு ஆணையின்படி, பெரம்பலூா் மாவட்டத்தில் விவசாயிகள் குறை தீா்க்கும் நாள் கூட்டத்தை முறையாக நடத்தவும், அதில் அனைத்து துறை அலுவலா்களும் பங்கேற்க வேண்டும். மேலும், விவசாயிகளின் மனுக்களையும், கோரிக்கைகளையும் முறையாக பதிவு செய்து, சம்பந்தப்பட்ட துறை மூலம் உரிய பதில் அளிக்க அரசு ஆவண செய்திட வேண்டும்.
பெரம்பலூா் மாவட்டத்தில் பெய்த தொடா் மழையால் பாதிக்கப்பட்ட மக்காச்சோளம், பருத்தி மற்றும் வெங்காயம் உள்ளிட்ட பயிா்களுக்கு சம்பந்தப்பட்ட துறை மூலம் முறையாக கணக்கீடு செய்து, உடனடியாக அரசு நிவாரணம் வழங்கிடவும், பயிா் காப்பீடு செய்துள்ள விவசாயிகளுக்கு இழப்பீடு வழங்கவும் நடவடிக்கை எடுக்க வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன.
இதில், வட்டார பொறுப்பாளா்கள் எம்.எஸ். ராஜேந்திரன், செல்லக்கருப்பு, சுந்தரராஜன், கிருஷ்ணசாமி, ஜெயபிரகாஷ், நல்லுசாமி, ராஜேந்திரன் உள்பட பலா் கலந்துகொண்டனா்.