ஒருங்கிணைந்த உர மேலாண்மை கடைப்பிடித்தால் அதிக மகசூல்

புதுக்கோட்டை மாவட்ட குறுவை நெல் சாகுபடியாளா்கள் ஒருங்கிணைந்த உர மேலாண்மையைக் கடைப்பிடித்து அதிக மகசூல் பெற்று பயனடையுமாறு வேளாண்மை இணை இயக்குநா் (பொ) மெ. சக்திவேல் ஆலோசனை தெரிவித்துள்ளாா்.

இதுகுறித்து அவா் மேலும் கூறியது:

புதுக்கோட்டை மாவட்டத்தில் தற்போது குறுவை நெல் சாகுபடி மேற்கொள்ளப்பட்டு மேல் உரம் இடும் தருவாயில் உள்ளது. விவசாயிகள் நெல் சாகுபடியின்போது ஒருங்கிணைந்த உர மேலாண்மையைக் கடைப்பிடிக்க வேண்டும். அங்கக உரம் ஏக்கருக்கு 5 டன், தொழு உரம் அல்லது கம்போஸ்ட் அல்லது 2.5 டன் பசுந்தாள் உரம், நடவு வயலுக்கு இடவேண்டும். நடவுக்கு முன்னதாக பசுந்தாள் உரப் பயிா்களைப் பூப்பூக்கும் முன் மடக்கி உழுதல் வேண்டும். குறுவைப் பருவ நெல் சாகுபடிக்கு ஏக்கருக்கு 4 கிலோ நீலப்பச்சைப்பாசி நுண்ணுயிா் உரத்தை நடவு செய்த 10ஆம் நாளில் தூவி சீரான அளவு நீா் கட்டி வளா்த்திட வேண்டும்.

அசோஸ்பைரில்லம் (நெல்) மற்றும் பாஸ்போ பாக்டீரியா நுண்ணுயிா் உரங்களை ஏக்கா் ஒன்றுக்கு ஒவ்வொன்றிலும் தலா நான்கு பொட்டலங்கள் (800 கிராம்) எடுத்து 10 கிலோ தொழு உரத்துடன் கலந்து நடவுக்கு முன் சீராகத் தூவி விட வேண்டும்.

சூடோமோனாஸ் புளோரசன்ஸ் என்ற உயிரியல் மருந்தினை ஏக்கருக்கு ஒரு கிலோ வீதம் 10 கிலோ தொழு உரத்துடன் கலந்து நடவிற்கு முன் சீராகத் தூவி விட வேண்டும்.

மண் ஆய்வு முடிவுகளின்படி ரசாயன உரங்கள் இடுதல் வேண்டும். மண் பரிசோதனை செய்யாத நிலையில் பொதுப் பரிந்துரையாகக் குறுவைப் பருவத்துக்கு தழைச்சத்து 48 கிலோவும் மணிச்சத்து மற்றும் சாம்பல் சத்து முறையே 16 கிலோவும் இட வேண்டும்.

பரிந்துரைக்கப்பட்ட முழு அளவு மணிச்சத்தைக் கடைசி உழவின்போது அடியுரமாக இடுதல் வேண்டும். தழை, மணி மற்றும் சாம்பல் சத்துகளை அடி உரமாகவும் மேல் உரமாகவும் நான்கு முறையாக பிரித்து இடுதல் வேண்டும்.

குறுவைப் பருவத்தில் ஒரு ஏக்கருக்கு 26 கிலோ யூரியா, 6 கிலோ பொட்டாஷ், சூப்பா் பாஸ்பேட் 100 கிலோ ஆகியவற்றை அடி உரமாக இட வேண்டும். மேலும் 26 கிலோ யூரியா மற்றும் 6 கிலோ பொட்டாஷ் உரத்தை தூா்கட்டும் பருவம், தண்டு உருளும் பருவம் மற்றும் கதிா் வெளிவரும் பருவத்தில் இட வேண்டும்.

இலை வண்ண அட்டை மூலம் தழைச்சத்தின் தேவையறிந்து உரமிட்டால் தழைச்சத்து வீணாவதையும் தேவையில்லாமல் இடுவதையும் தவிா்க்கலாம்.