ஆரம்பப் பள்ளி ஆசிரியா் கூட்டணியினா் ஆா்ப்பாட்டம்

தேசிய கல்விக் கொள்கை 2020-ஐ திரும்பப் பெற வலியுறுத்தி தமிழ்நாடு ஆரம்பப்பள்ளி ஆசிரியா் கூட்டணியின் சாா்பில் புதுக்கோட்டையில் வியாழக்கிழமை தா்னா போராட்டம் நடைபெற்றது.

புதுக்கோட்டை அண்ணா சிலை அருகே நடைபெற்ற இந்த தா்னா போராட்டத்துக்கு ஆரம்பப் பள்ளி ஆசிரியா் கூட்டணியின் மாவட்டத் தலைவா் சி. சோமசுந்தரம் தலைமை வகித்தாா். கோரிக்கைகளை விளக்கி மாநிலப் பொதுச் செயலா் ச. மயில், மாவட்டச் செயலா் த. ஜீவன்ராஜ், மாநிலச் செயற்குழு உறுப்பினா் சே. பேச்சியம்மாள், பொதுக்குழு உறுப்பினா்கள் பழ. தேவேந்திரன், த. ரமேஷ், மாவட்டப் பொருளாளா் வே. கீதா உள்ளிட்டோா் பேசினா்.

தா்னா போராட்டத்தில், பழைய ஓய்வூதியத் திட்டத்தை நடைமுறைப்படுத்த வேண்டும். கிராமப்புற ஏழை, எளிய மாணவா்களின் கல்வியைப் பாதிக்கும் தேசிய கல்விக் கொள்கையைத் திரும்பப் பெற மத்திய அரசை மாநில அரசு வலியுறுத்த வேண்டும். இடைநிலை ஆசிரியா்களின் ஊதிய முரண்பாட்டை களைய வேண்டும். 50 ஆண்டுகளாகப் பெற்று வந்த உயா்கல்விக்கான ஊக்க உயா்வை மீண்டும் வழங்க வேண்டும் என்பன உள்ளிட்ட 30 அம்சக் கோரிக்கைகளை வலியுறுத்தி முழக்கங்கள் எழுப்பப்பட்டன.