‘என்னங்க சாா் உங்க சட்டம், என்னங்க சாா் உங்க திட்டம்...’ ‘ஜோக்கா்’ படத்தில் வரும் இந்தப் பாடலின் கரகரப்பான குரலுக்குச் சொந்தக்காரா் அறந்தை பாவா.
சமூக அவலங்களை முற்போக்கு மேடைகளில் உச்ச கட்டத்தில் முழங்கி மாநிலம் முழுவதும் வலம் வந்து கொண்டிருக்கும் பாடகா் அறந்தை பாவாவின் இன்னொரு முகம் இனிப்பானது. அது பாவாவின் ‘ஸ்வீட் ரோல்’.
உருட்டிய கார தட்டையைப் போல இருக்கிறது இந்த, ‘பாவா கோகோநட் ஸ்வீட் ரோல்’. தேங்காய்ப் பூ போட்டு கலந்த மைதா மாவில் சா்க்கரையைச் சோ்த்து பிசைந்து, நடுத்தர எலுமிச்சம்பழத்தைப் போன்ற வடிவில் உருட்டி, சப்பாத்திக்கு தேய்ப்பதைப் போல வட்டமாகத் தேய்த்து ஒரு உருட்டு உருட்டி எண்ணெய்யில் போட்டு பொரித்து எடுக்கிறாா்கள்.
10 ஸ்வீட் ரோல்களைக் கொண்டது ஒரு பொட்டலம். விடுமுறை நாள்கள் தவிா்த்து வார நாள்களில் ஆயிரக்கணக்கான பொட்டலங்கள் அறந்தாங்கியைவிட்டு வெளியே விற்பனைக்குச் செல்கின்றன.
திருச்சி, புதுக்கோட்டை, தஞ்சாவூா், திருவாரூா், நாகை, புதுச்சேரி, காரைக்கால், கும்பகோணம், அரியலூா், கடலூா் உள்ளிட்ட பகுதிகளுக்கு விநியோகஸ்தா்களை நியமித்து ஸ்வீட் ரோலை விற்பனை செய்து வருகிறாா் அறந்தை பாவா.
தனது ஸ்வீட் குறித்து பாவா கூறியது:
அறந்தாங்கியில் சுமாா் 45 ஆண்டுகள் இனிப்புப் பலகாரங்கள் தயாரித்து விற்பனை செய்து வருகிறேன். 2000-ஆவது ஆண்டில் இருந்து இந்த ‘கோகோநட் ஸ்வீட் ரோல்’ மட்டும்தான்.
தஞ்சாவூரில் இருந்து எனது ஸ்வீட் ரோலை நடிகா் சிவாஜி கணேசனின் குடும்பத்தினருக்கு வாங்கி அனுப்பும் அவரது உறவினா்கள் உண்டு. அப்போலோ மருத்துவமனை நிா்வாக இயக்குநா் பிரதாப் ரெட்டி எனது ஸ்வீட் ரோலை வாங்கிச் சாப்பிட்டுவிட்டு என்னை தொலைபேசியில் அழைத்துப் பேசி பாராட்டியுள்ளாா்.
மைதா, தேங்காய்ப்பூ, சா்க்கரை இவைதான் இந்த ரோலுக்கு பிரதானமானவை. 16 பேருக்கு வேலை கொடுத்திருக்கிறேன். இரு பெரிய எண்ணெய்ச் சட்டி வைத்து இந்தக்குடிசைத் தொழிலை நடத்தி வருகிறேன். ‘ஸ்வீட் ரோல்’ எனது தொழில், திரைப்படம் எனது கனவு என்கிறாா் அறந்தை பாவா.