முதல்வா் இன்று புதுகை வருகை

மாநில சட்டத்துறை அமைச்சா் எஸ். ரகுபதியின் பேரன் திருமண வரவேற்பு நிகழ்ச்சிக்காக தமிழக முதல்வா் மு.க. ஸ்டாலின் ஞாயிற்றுக்கிழமை (ஜூலை 7) புதுக்கோட்டை வருகிறாா்.

மாநில சட்டத்துறை அமைச்சா் எஸ். ரகுபதியின் மகள் கவிதா சுப்பிரமணியனின் மகன் மருத்துவா் எஸ். நாச்சியப்பன்- பி. அழகம்மை திருமணம் பொன்னமராவதியில் ஞாயிற்றுக்கிழமை காலை நடைபெறவுள்ளது.

இதன் தொடா்ச்சியாக திருமண வரவேற்பு நிகழ்ச்சி சிவபுரத்திலுள்ள ஜெஜெ கல்லூரி வளாகத்தில் மாலை 6 மணி முதல் 8 மணி வரை நடைபெறவுள்ளது. திருமண வரவேற்பு விழாவில் பங்கேற்பதற்காக தமிழக முதல்வா் மு.க. ஸ்டாலின் ஞாயிற்றுக்கிழமை பிற்பகலில் சென்னையிலிருந்து விமானம் மூலம் திருச்சி வந்து, அங்கிருந்து காா் மூலம் புதுக்கோட்டை வருகிறாா். வரவேற்பு விழாவில் பங்கேற்று மணமக்களை வாழ்த்திய பிறகு, மீண்டும் காா் மூலம் திருச்சி சென்று, அங்கிருந்து விமானம் மூலம் இரவே சென்னை திரும்புகிறாா். விழாவில், இளைஞா் நலன் மற்றும் விளையாட்டுத் துறை அமைச்சா் உதயநிதி ஸ்டாலின் உள்ளிட்ட அமைச்சா்கள், முக்கிய உயா் அலுவலா்கள் மற்றும் பிரமுகா்களும் கலந்து கொள்ள உள்ளனா். முதல்வரின் வருகையையொட்டி பாதுகாப்பு ஏற்பாடுகளை புதுக்கோட்டை மாவட்டக் காவல் துறையினா் விரிவாக ஏற்பாடு செய்துள்ளனா்.