உண்மையான அதிமுகவினா் திமுகவுக்கு வாருங்கள் -அமைச்சா் எஸ்.ரகுபதி

அதிமுக பரிதாபத்துக்குரிய நிலையில் இருப்பதால் உண்மையான அதிமுகவினா் திமுகவுக்கு வாருங்கள் என மாநில சட்டத் துறை அமைச்சா் எஸ்.ரகுபதி அழைப்பு விடுத்தாா்.

புதுக்கோட்டை மாவட்டம், பெருங்களூரில் வியாழக்கிழமை நடைபெற்ற ‘மக்களுடன் முதல்வா்’ திட்டத்தின் தொடக்க விழா நிகழ்ச்சியில் பங்கேற்ற அவா் செய்தியாளா்களிடம் மேலும் கூறியது:

புதிய குற்றவியல் சட்டங்களை நடைமுறைப்படுத்த வேண்டும் என்ற கட்டாயச் சூழல் வரும்போது தமிழக அரசால் அமைக்கப்பட்டுள்ள ஒருநபா் குழு பரிந்துரைக்கும் திருத்தங்களை மேற்கொள்வோம்.

நாம் தமிழா் கட்சியின் நிா்வாகி சாட்டை துரைமுருகன், சமூக ஊடகங்களில் என்னென்ன சொற்களைப் பயன்படுத்தினாா்?, அந்தச் சொற்கள் கைது நடவடிக்கைக்கு உகந்ததா? என்பதை படித்து பாா்த்துவிட்டு, அதன்பிறகு அரசின் மீது குற்றம் சுமத்தலாம். பழிவாங்கும் நோக்கத்துடன் அவரைக் கைது செய்ய வேண்டிய அவசியம் எங்களுக்கு இல்லை. சட்டம்- ஒழுங்கைப் பாதுகாக்க வேண்டும். அமைதியை நிலைநாட்ட வேண்டும்.

தற்போது அதிமுகவின் நிலைமை பரிதாபத்துக்கு உரியதாக உள்ளது. கொங்கு மாவட்டங்களைச் சோ்ந்தவா்களும், டெல்டா மாவட்டங்களைச் சோ்ந்தவா்களும் முன்னாள் முதல்வா் எடப்பாடி பழனிசாமிக்கு அழுத்தம் கொடுத்துக் கொண்டு இருக்கிறாா்கள். அங்கு இருக்கும் உண்மையாக அதிமுக தொண்டா்கள், திமுகவுக்கு வாருங்கள் என்று அழைக்கிறோம். அவ்வாறு வருவோரை திமுக தலைவா் அரவணைத்துக் கொள்வாா். ஏற்கெனவே வந்தவா்கள் எப்படி இருக்கிறாா்கள் என்பதை எல்லோரும் அறிவாா்கள்.

அதிமுக முன்னாள் அமைச்சா் எம்.ஆா். விஜயபாஸ்கா், தலைமறைவாக இருப்பதிலேயே அவா் தவறு செய்துள்ளாா் என்பது தெரிகிறது. தைரியம் இருந்தால் அவா் வெளியே வரலாம். அவா் எந்த மாநிலத்தில் இருந்தாலும் தேடிக் கண்டுபிடித்து சட்டத்தின் முன்பு நிறுத்த வேண்டிய பொறுப்பு காவல் துறைக்கு உள்ளது. எனவே, அவரை போலீஸாா் தேடிக்கொண்டு இருக்கின்றனா் என்றாா் ரகுபதி.