தீ விபத்தில் உணவகம் எரிந்து சேதம்

ஒரத்தநாட்டில் அமமுக நிர்வாகியின் உணவகம் சனிக்கிழமை நள்ளிரவு தீவிபத்தில் எரிந்து சேதமடைந்தது.
ஒரத்தநாடு யானைக்கார தெருவை சேர்ந்தவர்  ராதாகிருஷ்ணன் (50). அம்மா மக்கள் முன்னேற்ற கழகத்தின் ஒரத்தநாடு பகுதியின் நகரச் செயலராக இருந்து வரும் இவர் வீட்டினருகே கூரை கொட்டகையில் உணவகம் நடத்தி வருகிறார். சனிக்கிழமை நள்ளிரவு உணவகத்தில் மின் கசிவால் தீப்பற்றியது. தகவலின்பேரில், ஒரத்தநாடு தீயணைப்பு துறையினர் சம்பவ இடத்துக்கு வந்து தீயை அணைக்கும் பணியில் ஈடுபட்டனர். அப்போது,  கடையில் இருந்த சிலிண்டர் வெடித்ததால் தீ மேலும் பரவியது. இதில் கடையில் இருந்த கிரைண்டர், மிக்ஸி, பிரிட்ஜ் உள்பட சுமார் ரூ. 10 லட்சம் மதிப்பிலான பொருள்கள் தீயில் எரிந்து சேதமடைந்தன. இதுகுறித்து ஒரத்தநாடு போலீஸார் விசாரணை மேற்கொண்டு வருகின்றனர்.