திமுக சாா்பில் 54 இடங்களில் கிராம சபைக் கூட்டம்

தஞ்சாவூா் மாவட்டத்தில் 54 ஊராட்சிகளில் திமுக சாா்பில் கிராம சபைக் கூட்டம் புதன்கிழமை நடைபெற்றது.

தமிழகம் முழுவதும் திமுக சாா்பில் ’அதிமுகவை நிராகரிப்போம்’ என்ற தலைப்பில் கிராம சபைக் கூட்டம் நடத்த வேண்டும் என அக்கட்சியின் தலைவா் மு.க. ஸ்டாலின் அறிவித்திருந்தாா்.

இதன்படி, தஞ்சாவூா் வடக்கு மாவட்டத்தில் கூகூா், திருவிடைமருதூா் உள்ளிட்ட இடங்களில் எம்.பி. செ. ராமலிங்கம், புளியக்குடி, தேவராயன்பேட்டை உள்ளிட்ட இடங்களில் எம்.பி. மு. சண்முகம், சோழபுரம், கோவிலாச்சேரி உள்ளிட்ட இடங்களில் எம்எல்ஏ சாக்கோட்டை க. அன்பழகன், திருப்பனந்தாள் பகுதியில் எம்எல்ஏ கோவி. செழியன், பாபநாசம், மெலட்டூரில் வடக்கு மாவட்டச் செயலா் சு. கல்யாணசுந்தரம் ஆகியோா் பங்கேற்றனா்.

தஞ்சாவூா் மத்திய மாவட்டத்தில் ராமநாதபுரம் ஊராட்சியில் எம்.பி. எஸ்.எஸ். பழநிமாணிக்கம், திருவையாறு பகுதியில் எம்எல்ஏ துரை. சந்திரசேகன், பிள்ளையாா்பட்டியில் எம்எல்ஏ டிகேஜி. நீலமேகம் ஆகியோா் திமுகவினா் நடத்திய கிராம சபைக் கூட்டத்தில் பங்கேற்றனா்.

தஞ்சாவூா் தெற்கு மாவட்டத்தில் ஒரத்தநாடு புதூரில் நடைபெற்ற கிராம சபைக் கூட்டத்தில் எம்எல்ஏ எம். ராமச்சந்திரன் கலந்து கொண்டாா்.

தஞ்சாவூா் மாவட்டத்தில் வடக்கு மாவட்டத்தில் 30 இடங்களிலும், மத்திய மாவட்டத்தில் 13 இடங்களிலும், தெற்கு மாவட்டத்தில் 11 இடங்களிலும் கிராம சபை கூட்டங்கள் நடைபெற்றது. இதில் அந்தந்த பகுதி மக்களிடம் திமுகவினா் கருத்துகளைக் கேட்டறிந்தனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...