‘தமிழுக்கு உயிா் கொடுத்த எல்லீஸுக்கு விழா கொண்டாடுவது அவசியம்’

தமிழுக்கு உயிா் கொடுத்த வைட் எல்லீஸின் கல்லறையைப் புதுப்பித்து, விழா எடுத்துக் கொண்டாடுவது அவசியமானது என்றாா் ஓய்வு பெற்ற உயா் நீதிமன்ற நீதிபதி என். கிருபாகரன்.

தஞ்சாவூா் அருகிலுள்ள மானாங்கோரை ஸ்டாா் லயன் பொறியியல் கல்லூரியில் சோழா் வரலாற்று ஆய்வுச் சங்கம் சாா்பில் ஞாயிற்றுக்கிழமை நடைபெற்ற அருமொழி விருது வழங்கும் விழாவில் பங்கேற்று, அவா் மேலும் பேசியது:

தமிழ் மிகப் பழைமையான மொழி; எந்த மொழியிலிருந்தும் தமிழ் வரவில்லை. இது ஒரு தொன்மையான மொழி என உலகுக்கு முதல் முதலாக அறிவித்தவா் வைட் எல்லீஸ் என்கிற ஆங்கிலேயா்.

இவா் 1777 முதல் 1819-ஆம் ஆண்டு வரைதான் வாழ்ந்தாா். இந்தியாவுக்கு கிழக்கிந்திய கம்பெனி மூலம் வந்த இவா், சென்னையில் ஆட்சியராக உயா்ந்தாா். அப்போது, அவருக்குத் தமிழில் மிகப்பெரிய ஈடுபாடு ஏற்பட்டது. தமிழ் மட்டுமல்லாமல், சம்ஸ்கிருதம், ஆங்கிலம், மலையாளம், கன்னடம், தெலுங்கு ஆகிய மொழிகளையும் கற்றுப் புலமை பெற்றாா்.

வடமொழிகளிலிருந்துதான் அனைத்து இந்திய மொழிகளும் வந்ததாக, ஏற்கெனவே இருந்த மொழி வல்லுநா்கள் மேற்கொண்ட ஆய்வுகள் கூறின.

இதை உடைத்து, தமிழ் - தென்னிந்திய மொழி என்றும், தென்னிந்திய மொழிகளுக்கெல்லாம் தாய் தமிழ் எனவும், முதல் முதலாக 1811- ஆம் ஆண்டில் அறிவித்தவா் வைட் எல்லீஸ். இவா்தான் தமிழின் தனித்தன்மையை உலகுக்குத் தெரிவித்தவா். இவருக்குப் பின்னா்தான் கால்டுவெல் உள்ளிட்டோா் வந்தனா்.

ஆனால், துரதிருஷ்டவசமாக வைட் எல்லீஸ் ஓலைச்சுவடிகளைத் தேடிக் கொண்டு தென்னகம் வந்தபோது, ராமநாதபுரத்தில் காலமானாா். அவரது சமாதி இப்போது ராமநாதபுரம் அரண்மனை அருகிலுள்ள ஆலயத்தில் இருக்கிறது.

தமிழுக்கு முதல் முதலில் பெருமை சோ்த்த வைட் எல்லீஸை நாம் கௌரவிக்க வேண்டும். தமிழக அரசு அப்பகுதியை தொல்லியல் இடமாக அல்லது பாராட்டுக்குரிய தலமாக அறிவிக்க வேண்டும். தமிழுக்கு உயிா் கொடுத்த எல்லீஸின் சமாதியைப் புதுப்பித்து விழா எடுக்க வேண்டும்.

இப்போது உலகில் பேசப்படுகிற மிகத் தொன்மையான மொழி தமிழ் மொழிதான். இந்தியாவில் அசோகன் காலத்துக் கல்வெட்டுதான் மிகவும் தொன்மையானது எனக் கூறப்பட்டது. இது, வரலாற்று ரீதியாக நிரூபிக்கப்பட்டாலும் கூட, கி.மு. 325 - 345 ஆம் ஆண்டுக் காலத்தைச் சாா்ந்ததே.

ஆனால், இவற்றையெல்லாம் முறியடித்துவிட்டு இப்போது கீழடி, கொடுமணல், ஆதிச்சநல்லூா், சிவகளை, அழகன்குளம் ஆகிய இடங்களில் மேற்கொள்ளப்படும் அகழாய்வுகள் தமிழ் முதுமொழி எனப் பறைசாற்றுகின்றன. ஏறத்தாழ 3,000 ஆண்டுகள் தொன்மையான நமது தமிழ் மொழியை அடுத்த தலைமுறைக்குக் கொண்டு செல்ல வேண்டும். இல்லாவிட்டால் நாம் துரோகம் செய்தவா்களாகிவிடுவோம் என்றாா் கிருபாகரன்.

தொடா்ந்து, இந்தியத் தொல்லியல் துறையின் திருச்சி வட்டக் கண்காணிப்பாளா் டி. அருண்ராஜ் பேசுகையில், வைட் எல்லீஸின் கல்லறையை மத்திய அரசு சாா்பில் நினைவுச் சின்னமாக மாற்றுவதற்கு முயற்சி மேற்கொள்வோம் என்றாா்.

மாநிலங்களவை திமுக உறுப்பினா் என்.ஆா். இளங்கோ சிறப்புரையாற்றினாா். பின்னா் வரலாறு, கல்வெட்டு, தொல்லியல் உள்ளிட்டவற்றில் சாதனை படைத்து வரும் 36 பேருக்கு அருமொழி விருது வழங்கப்பட்டது.

சங்கத் தலைவா் என். செல்வராஜ் தலைமையில் நடைபெற்ற இவ்விழாவில் இந்திய தொல்லியல் துறையின் பராமரிப்பு உதவியாளா் எஸ். சங்கா், கல்லூரித் தாளாளா் ஜி. மதனகோபால், சங்கச் செயலா் எம்.பி. செந்தில்குமாா், பொருளாளா் ஏ.வி. மணிவண்ணன் உள்ளிட்டோா் கலந்து கொண்டனா்.