யாருக்கு வாக்கு சேகரிப்பது? குழப்பத்தில் காங்கிரஸாா்

திமுக கூட்டணியில் காங்கிரஸுக்கு கரூா் முதல் நாகை வரை ஒரு தொகுதி கூட ஒதுக்கீடு செய்யப்படாததால் நிா்வாகிகள், தொண்டா்கள் குழப்பத்தில் உள்ளனா்.

இந்நிலையில், தஞ்சாவூா் மேல வீதியிலுள்ள தியாகிகள் இல்லத்தில் தஞ்சாவூா் மாவட்ட தெற்கு காங்கிரஸ் கமிட்டி ஆலோசனைக் கூட்டம் ஞாயிற்றுக்கிழமை மாலை நடைபெற்றது. இதில், பங்கேற்ற நிா்வாகிகள், தொண்டா்கள் கரூா் முதல் நாகை வரை ஒரு வேட்பாளா் கூட இல்லாதது குறித்து அதிருப்தி தெரிவித்தனா்.

இதுகுறித்து செய்தியாளா்களிடம் தஞ்சாவூா் தெற்கு மாவட்ட காங்கிரஸ் கமிட்டி தலைவா் து. கிருஷ்ணசாமி வாண்டையாா் தெரிவித்தது:

திமுக கூட்டணியில் கரூரில் தொடங்கி நாகை வரையிலும் காங்கிரசுக்கு ஒரு தொகுதிக்குக் கூட ஒதுக்கீடு செய்யப்படவில்லை. இதனால், இங்குள்ள தொண்டா்கள் எல்லோரும் மனவேதனை அடைந்துள்ளனா். காங்கிரசுக்கு ஒரு வேட்பாளா் கூட இல்லாத நிலையில் எப்படி கட்சியை நடத்துவது என்ற நிலைமை ஏற்பட்டுள்ளது.

கரூரில் தொடங்கி நாகை வரையிலும் காங்கிரசுக்கு வேட்பாளா் இல்லாதது இதுவே முதல் தோ்தல். காங்கிரஸ் என்பது பெரிய இயக்கம். இதற்கு எந்தவொரு வேட்பாளரும் இல்லாததால், யாருக்கு வாக்கு சேகரிப்பது என்பது தெரியவில்லை என்ற நிலைமைக்கு தள்ளப்பட்டுள்ளோம்.

கூட்டணியில் ஏற்கெனவே 41 தொகுதிகள் ஒதுக்கீடு செய்யப்பட்ட நிலையில், இப்போது 25 தொகுதிகளாகக் குறைத்துவிட்டனா். இதையும் காங்கிரஸ் கட்சியில் எந்த மாவட்டத் தலைவரையும் கேட்காமல் அவரவா் வசதிக்கு ஏற்ப சீட் வாங்கிக் கொண்டனா். ஒரு பகுதியை முழுவதுமாகப் புறக்கணித்துவிட்டனா்.

தஞ்சாவூா் மாவட்டத்தில் ஒரு வேட்பாளா் கூட இல்லாததால், ஆதரவற்று இருப்பதுபோல உள்ளது. இதனால், கட்சியில் யாருக்கும் மரியாதை இல்லாமல் போகிறது. இந்த நிலைமை தொடா்ந்தால் கட்சியை வளா்க்க முடியாது என்றாா் கிருஷ்ணசாமி வாண்டையாா்.

இக்கூட்டத்தில் மாநிலத் துணைத் தலைவா் ராஜாதம்பி, தெற்கு மாவட்டத் துணைத் தலைவா் கோ. அன்பரசன், ஐஎன்டியுசி பொதுச் செயலா் என். மோகன்ராஜ், பொதுக் குழு உறுப்பினா் கண்டிதம்பட்டு கோவிந்தராஜ், பொருளாளா் வயலூா் எஸ். ராமநாதன் உள்ளிட்டோா் கலந்து கொண்டனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...