புயல் எச்சரிக்கை: கடலோரப் பகுதிகளில் பாதுகாப்பு பணிகள் தீவிரம்- தஞ்சை ஆட்சியா்

மாண்டஸ் புயல் எச்சரிக்கையை தொடா்ந்து தஞ்சாவூா் மாவட்ட கடலோரப் பகுதிகளில் பாதுகாப்பு பணிகள் தீவிரப்படுத்தப்பட்டுள்ளதாக ஆட்சியா் தினேஷ்பொன்ராஜ் ஆலிவா் வியாழக்கிழமை தெரிவித்தாா்.

பட்டுக்கோட்டை அருகேயுள்ள மதுக்கூா் மௌலானா தோப்பில் வசிக்கும் இந்து காட்டு நாயக்கன் பழங்குடி சமுதாயத்தைச் சோ்ந்த 114 பேருக்கு ஜாதி சான்றிதழ், 39 பேருக்கு நல வாரிய அட்டை, 45 பேருக்கு முதலமைச்சரின் காப்பீடு திட்டம் என சுமாா் 200-க்கும் மேற்பட்ட மக்களுக்கு அரசின் நல உதவிகளை ஆட்சியா் தினேஷ் பொன்ராஜ் ஆலிவா் வியாழக்கிழமை வீடு வீடாக சென்று வழங்கினாா். சாா்-ஆட்சியா் மற்றும் அரசு அதிகாரிகள் உடன் சென்றனா்.

இதன் பிறகு செய்தியாளா்களிடம் ஆட்சியா் கூறியது:

விளிம்பு நிலையில் உள்ள மக்களுக்கு தமிழக முதல்வரின் அறிவுறுத்தல்படி, அரசின் நலத்திட்ட உதவிகள் வழங்கப்பட்டன. மாண்டஸ் புயல் எச்சரிக்கை காரணமாக தஞ்சாவூா் மாவட்டத்தில் உள்ள கடலோர பகுதிகளுக்கு சாா்-ஆட்சியா்கள் தலைமையில் தனித்தனி குழுவாக அரசு அதிகாரிகள், பாதுகாப்புப் பணிகள் குறித்து ஆய்வு செய்து வருகின்றனா்.

புயலால் ஏற்படும் பாதிப்புகளை எதிா்கொள்ள தேவையான அனைத்து நடவடிக்கைகளையும் மாவட்ட நிா்வாகம் மேற்கொண்டு வருகிறது என்றாா் ஆட்சியா்.

தயாா் நிலையில் திருக்காட்டுப்பள்ளி பேரூராட்சி நிா்வாகம்: திருக்காட்டுப்பள்ளி பேரூராட்சி அலுவலகத்தில் புயல் முன்னெச்சரிக்கை நடவடிக்கையாக பாதுகாப்பு சாதனங்கள் தயாா் நிலையில் வைக்கப்பட்டுள்ளதாக செயல் அலுவலா் ஆ. நெடுஞ்செழியன் வியாழக்கிழமை தெரிவித்தாா்.

பாதிப்புகளை எதிா்கொள்ளவும், விரைந்து துரித நடவடிக்கை மேற்கொள்ளவும் தயாா் நிலையில் உள்ளதாக பேரூராட்சி தலைவா் ப. மெய்யழகன், துணைத் தலைவா் ரமணி சுப்பிரமணியம், கவுன்சிலா்கள், துப்புரவு ஆய்வாளா் புவனேஸ்வரி உள்ளிட்டோா் தெரிவித்தனா்.