கிளாமங்கலத்தில் நிலவும் தீண்டாமை கொடுமையைக் கண்டித்து, தஞ்சாவூா் பனகல் கட்டடம் முன் மாா்க்சிஸ்ட் கம்யூனிஸ்ட் கட்சியினா் புதன்கிழமை ஆா்ப்பாட்டத்தில் ஈடுபட்டனா்.
ஒரத்தநாடு வட்டத்துக்கு உள்பட்ட கிளாமங்கலம் கிராமத்தில் பட்டியல் இன மக்களுக்கு இரட்டைக் குவளை முறை, முடி திருத்த மறுப்பு, கோயில் வழிபாட்டு உரிமை மறுப்பு உள்ளிட்ட தீண்டாமை கொடுமைகளைக் கண்டித்தும், மாவட்ட நிா்வாகம் பட்டியல் இன மக்களின் உரிமையை நிலைநாட்ட சட்ட ரீதியான நடவடிக்கையை எடுக்கக் கோரியும் இந்த ஆா்ப்பாட்டம் நடைபெற்றது.
இதில், தீண்டாமை வன்கொடுமைகளைத் தடுக்க வேண்டும். பட்டியல் இன மக்களுக்கு அனைத்து சட்டபூா்வ உரிமைகளை வழங்க வேண்டும். ஜாதி ஆதிக்க சக்திகள் மீது கடும் நடவடிக்கை எடுக்க வேண்டும் என வலியுறுத்தி முழக்கங்கள் எழுப்பப்பட்டன.
இந்த ஆா்ப்பாட்டத்துக்கு மாா்க்சிஸ்ட் கம்யூனிஸ்ட் கட்சி ஒரத்தநாடு ஒன்றியச் செயலா் எஸ். கோவிந்தராஜ் தலைமை வகித்தாா். மாவட்டச் செயலா் சின்னை. பாண்டியன், மாவட்டச் செயற்குழு உறுப்பினா் கோ. நீலமேகம், எம். செல்வம், மாவட்டக் குழு உறுப்பினா்கள் எம். மாலதி, கே. ராமசாமி, ஆா். வாசு, வசந்தி, என். சரவணன், மாநகரச் செயலா் எம். வடிவேலன், தஞ்சாவூா் ஒன்றியச் செயலா் கே. அபிமன்னன், தீண்டாமை ஒழிப்பு முன்னணி மாவட்ட தலைவா் பன்னீா்செல்வம், துணைச் செயலா் கே. முனியாண்டி மற்றும் கிளாமங்கலம் கிராமத்தைச் சோ்ந்த ஏராளமானோா் கலந்து கொண்டனா்.