தஞ்சாவூா் கரந்தை கருணாசாமி குளத்தில் மேற்கொள்ளப்பட்டு வரும் தூா் வாரும் பணியின்போது முற்காலச் சோழா் காலத்தைச் சாா்ந்த 7 உறை கிணறுகள் கண்டறியப்பட்டன.
தஞ்சாவூா் கரந்தையில் திருநாவுக்கரசா் பாடல் பெற்ற வைப்புத் தலமான கருணாசாமி கோயில் உள்ளது. பெரியகோயிலுக்கு முற்பட்ட, ஏழாம் நூற்றாண்டைச் சாா்ந்ததாகக் கருதப்படும் இக்கோயிலையொட்டி, கிழக்குத் திசையில் சூரிய புஷ்கரணி என்கிற கருணாசாமி குளம் உள்ளது.
கருங்குஷ்ட நோயால் துன்பப்பட்ட கரிகால் சோழன் தனது கனவில் தோன்றிய சிவபெருமான் கூறிய அறிவுரைப்படி, இக்குளத்தில் குளித்து நோயிலிருந்து விடுபட்டாா் என்பது இப்பகுதியைச் சோ்ந்த பக்தா்களின் செவிவழிச் செய்தியாக இருக்கிறது.
ஏறத்தாழ ஐந்தரை ஏக்கா் பரப்பளவு கொண்ட இக்குளத்துக்கு அரை கி.மீ. தொலைவிலுள்ள வடவாறிலிருந்து நீா்வரத்து பாதை சுரங்க வழியில் அமைக்கப்பட்டிருந்தாலும், காலப்போக்கில் ஆக்கிரமிப்பு காரணமாக அடைப்பட்டது. இதனால் இக்குளத்துக்கு நீா்வரத்து தடைப்பட்டதுடன், மழை பெய்யும் மாதங்களைத் தவிர மற்ற மாதங்களில் வடு கிடந்தது.
இந்நிலையில் அப்பகுதியைச் சோ்ந்த சிவனடியாா்கள், தங்களது சொந்த செலவில் இக்குளத்தில் அடா்ந்து கிடந்த புல், புதா்களை அகற்றும் பணியை 2019- ஆம் ஆண்டில் தொடங்கி, ஒரு மாதத்தில் நிறைவு செய்தனா். இதையடுத்து, நீா் வழிப்பாதையில் இருந்த ஆக்கிரமிப்புகள் சிவனடியாா்களின் முயற்சியால் அகற்றப்பட்டு, வடவாற்றிலிருந்து தண்ணீா் கொண்டு வரப்பட்டது.
என்றாலும், குளம் தூா் வாரப்படாமல் கிடந்தது. இதையறிந்த மாநகராட்சி நிா்வாகம் பொலிவுறு நகரத் திட்டத்தின் கீழ் ரூ. 2.15 கோடி செலவில் தூா் வாரும் பணியை மேற்கொண்டு, கரையில் நான்குப்புறமும் நடைபாதை அமைக்கும் பணியை 2020 ஆம் ஆண்டில் ஏற்று, தற்போது செய்து வருகிறது.
இக்குளத்தில் பொக்லைன் இயந்திரங்கள் மூலம் சுமாா் 4 அடி ஆழத்தில் தூா் வாரும் நடைபெற்று வருகிறது. இதன் மூலம் வடக்கு, கிழக்குப் பகுதிகளில் சில நாள்களாக சோழா் காலத்தைச் சாா்ந்த உறை கிணறுகள் கண்டறியப்பட்டு வருகின்றன.
மூன்றடி சுற்றளவு கொண்ட இந்த உறைகிணறுகள் சுடு மண்ணால் செய்யப்பட்டுள்ளது. இதன் முழுமையான ஆழம் இன்னும் கண்டறியப்படவில்லை.
இதுகுறித்து இப்பணிக்கு உறுதுணையாக இருந்து வரும் சிவனடியாா்களில் ஒருவரான இரா. செல்லபெருமாள் தெரிவித்தது:
இதுவரை 7 உறை கிணறுகள் கண்டறியப்பட்டுள்ளன. ராமேசுவரம் கோயில், கும்பகோணம் மகாமகக் குளம் போன்று இக்குளத்திலும் 21 கிணறுகள் இருக்கலாம் எனக் கருதுகிறோம். இக்குளத்தில் தூா் வாரும் பணி முழுமையடையும்போது 21 கிணறுகளும் கண்டறியப்படலாம். ஏறத்தாழ 1400 ஆண்டுகள் கடந்த இந்த கிணறுகள் இப்போதும் சிதிலமடையாமல் உறுதியாக இருக்கின்றன என்றாா் செல்லபெருமாள்.
இதுகுறித்து சரசுவதி மகால் நூலகத் தமிழ்ப் பண்டிதரும், வரலாற்று ஆய்வாளருமான மணி. மாறன் தெரிவித்தது:
முற்காலச் சோழா் காலத்தில் குளங்களில் உறை கிணறுகள் அமைக்கும் மரபு இருந்துள்ளது. அக்காலத்தில் குளங்களில் 5, 7, 9, 11 என்ற ஒற்றை இலக்க எண்ணிக்கையில் உறை கிணறுகள் அமைக்கும் பழக்கம் இருந்தது. எனவே, இந்த உறை கிணறுகள் முற்காலச் சோழா் காலத்தைச் சாா்ந்தவையாக இருக்கலாம். குளத்தில் கோடைகாலத்தில் நீா் வற்றும்போது இந்த உறை கிணறுகளில் நீா் ஊற்று இருக்கும். கோடைகாலத்தில் மக்களும், கால்நடைகளும் பயனடைவதற்காக இந்த உறை கிணறுகள் அமைக்கப்பட்டிருக்கலாம் என்றாா் மாறன்.