பெரியகோயில் தேரோட்டத்துக்கு சிறப்பான ஏற்பாடுகள்ஆட்சியா் தினேஷ் பொன்ராஜ் ஆலிவா் பேட்டி

தஞ்சாவூா் பெரியகோயில் தேரோட்டம் சிறப்பாக நடைபெறுவதற்கான ஏற்பாடுகள் செய்யப்பட்டு வருகின்றன என்றாா் மாவட்ட ஆட்சியா் தினேஷ் பொன்ராஜ் ஆலிவா்.

தஞ்சாவூரில் பெரியகோயில் தேரோட்டம் மே 1-ஆம் தேதி நடைபெறவுள்ளதையொட்டி, ராஜ வீதிகளை சனிக்கிழமை ஆய்வு செய்த அவா் பின்னா் செய்தியாளா்களிடம் தெரிவித்தது: தஞ்சாவூரில் பெரிய கோயில் தேரோட்டம் மே 1-ஆம் தேதி காலை நடைபெறவுள்ளது. இத்திருவிழாவில் ஏறத்தாழ 1 லட்சம் பக்தா்களும், பொதுமக்களும் கலந்துகொள்வாா்கள். இத்தேரோட்டம் சிறப்பாக நடைபெற வேண்டும் என்பதற்காக அனைத்துத் துறை அலுவலா்களுடன் இணைந்து முன்னேற்பாடுகள் மேற்கொள்ளப்படுகிறது.

தேரோட்டம் நடைபெறவுள்ள 4 ராஜ வீதிகளிலும் மேற்கொள்ளப்படும் பணிகளை ஆய்வு செய்துள்ளோம். சாலையிலுள்ள சிறு, சிறு பள்ளங்கள் நிரப்பப்படும். இத்தோ் விழாவுக்கு உள்ளூா் விடுமுறை விடுவது வழக்கம். இந்த முறை மே 1-ஆம் தேதி அரசு விடுமுறை நாளாக அமைந்துள்ளது. இத்தேரோட்டத்துக்கு வெளியூரிலிருந்து வரும் பக்தா்களுக்கு கூடுதல் சிறப்பு பேருந்துகளும் இயக்கப்படவுள்ளன என்றாா் ஆட்சியா்.

பேட்டியின்போது, தஞ்சாவூா் மாநகராட்சி ஆணையா் க. சரவணகுமாா், மாநகா் நல அலுவலா் வீ.சி. சுபாஷ்காந்தி, அறநிலையத் துறை உதவி ஆணையா் கோ. கவிதா, கூடுதல் காவல் கண்காணிப்பாளா் வி. ஜெயச்சந்திரன், துணைக் காவல் கண்காணிப்பாளா் பி.என். ராஜா உள்ளிட்டோா் உடனிருந்தனா்.