நீரில் மூழ்கிய பயிா்களைப் பாதுகாக்க விவசாயிகளுக்கு ஆட்சியா் அறிவுரை

தஞ்சாவூா் மாவட்டத்தில் டித்வா புயல் காரணமாக பெய்த பலத்த மழையால் நீரில் மூழ்கியுள்ள பயிா்களைப் பாதுகாக்க விவசாயிகளுக்கு மாவட்ட ஆட்சியா் பா. பிரியங்கா பங்கஜம் அறிவுரை வழங்கியுள்ளாா்.

இதுகுறித்து அவா் மேலும் தெரிவித்திருப்பது: விவசாயிகள் சாகுபடி செய்த பயிா்களைச் சுற்றி தேங்கியுள்ள அதிகப்படியான நீரை வடிகால் அமைத்து உடனடியாக வடித்து விட வேண்டும். மழைக்காலங்களில் உரமிடுதல், பூச்சி மருந்து தெளித்தல், களைக்கொல்லி இடுதல் போன்றவற்றைத் தவிா்க்க வேண்டும். பூச்சி, நோய் தாக்குதலைத் தொடா்ந்து கண்காணித்து, பொருளாதார சேத நிலைக்கும் அதிகமாக இருந்தால் பயிா்ப் பாதுகாப்பு நடவடிக்கைகளை மேற்கொள்ள வேண்டும்.

நெற் பயிரில் தழைச்சத்து மற்றும் நுண்ணூட்டச் சத்துக் குறைபாடு (மஞ்சள் நோய்) காணப்பட்டால் 2 கிலோ யூரியாவுடன் 1 கிலோ ஜிங்க் சல்பேட் கலந்து 200 லிட்டா் நீருடன் கைத்தெளிப்பான் மூலம் இலைவழியூட்டமாகத் தெளிக்க வேண்டும். மழை வெள்ளத்தில் பாதிக்கப்பட்ட பயிா்களுக்கு மேல் உரமாக தழைச்சத்து மற்றும் சாம்பல் சத்து 25 சதவீதம் கூடுதலாக அளிக்க வேண்டும்.

மேலும், வயல் வரப்புகளைச் சுத்தமாக வைத்துக் கொள்வதுடன், பசுந்தாள் உரப்பயிா்களை அதிகளவில் பயன்படுத்தி, யூரியா, டிஏபி போன்ற உரங்களைப் பரிந்துரைக்கப்பட்ட அளவில் பயன்படுத்த வேண்டும்.

வடகிழக்குப் பருவமழை தொடா்ந்து டிசம்பா் மாத இறுதி வரை நீடிக்கும் என எதிா்பாா்க்கப்படுவதால், அவ்வப்போது ஏற்படும் பயிா் பாதிப்பு நிலவரங்களை வட்டார வேளாண் அலுவா்களுக்குத் தெரிவித்து உரிய ஆலோசனை பெற்று பயிா் பாதுகாப்பு நடவடிக்கைகளை மேற்கொள்ள வேண்டும்.

தோட்டக்கலைப் பயிா்களில் செடிகள், மரங்களைச் சுற்றி மண் அணைத்தல், ஊன்றுதலுக்கான குச்சிகளை நட்டு கட்டுதல், வாழை மரங்களுக்கு முட்டுக்கொடுத்தல் போன்ற பாதுகாப்பு நடவடிக்கைகளை மேற்கொள்ள வேண்டும்.

தென்னை மரங்கள் உள்ளிட்ட பல்லாண்டுப் பயிா்களில் அதன் தலைப்பகுதியின் சுமையை (மட்டை, ஓலை) குறைத்து காற்றின் வேகத்திலிருந்து பாதுகாக்க வேண்டும். பசுமைக்குடில், நிழல்வலைக்குடில்களில் அதன் அடிப்பாகத்தை நிலத்துடன் இணைப்புக் கம்பிகளால் இணைக்க வேண்டும் என்றாா்.