3 மடங்கு கூடுதல் நெல் கொள்முதல்: அமைச்சா் சக்கரபாணி

தஞ்சாவூா்: தமிழகத்தில் நிகழாண்டு நெல் விளைச்சல் அதிகரித்துள்ளதால், கடந்த ஆண்டுகளை விட 3 மடங்கு கூடுதலாக கொள்முதல் செய்யப்பட்டுள்ளது என்றாா் உணவுத் துறை அமைச்சா் அர. சக்கரபாணி.

தஞ்சாவூா் அருகே பிள்ளையாா்பட்டி நெல் சேமிப்புக் கிடங்கில் நெல் மூட்டைகள் பாதுகாப்பாக வைக்கப்பட்டுள்ளதை புதன்கிழமை ஆய்வு செய்த பின்னா் அவா் செய்தியாளா்களிடம் தெரிவித்தது:

தஞ்சாவூா் மாவட்டத்தில் தற்போது 299 நேரடி நெல் கொள்முதல் நிலையங்கள் செயல்பட்டு வருகின்றன. இதுவரை 1.60 லட்சம் டன் நெல் கொள்முதல் செய்யப்பட்டுள்ளது. தற்போது நாள்தோறும் 1,250 லாரிகளில் வெளி மாவட்டங்களுக்கு நெல் மூட்டைகளை அனுப்பி வருகிறோம். மேலும், சரக்கு ரயில்கள் மூலம் தினமும் 8 ஆயிரம் மூட்டைகள் அனுப்பப்படுகின்றன. இன்னும் 21 ஆயிரத்து 500 ஏக்கரில் அறுவடையும், ஏறத்தாழ 50 ஆயிரம் டன் நெல் கொள்முதலும் செய்யப்பட வேண்டியுள்ளது.

தற்போது 14 லட்சம் சாக்குகள் கையிருப்பில் உள்ள நிலையில், 66 லட்சம் சாக்குகள் வந்து கொண்டிருக்கின்றன. நூறு பேல் சணல் இருப்பு உள்ளது. நாள்தோறும் 5 ஆயிரம் டன் நெல் வந்து கொண்டிருக்கிறது. தற்போது 4 திறந்தவெளி சேமிப்புக் கிடங்குகளில் ஒரு லட்சம் டன்னும், வாடகைக்கு எடுக்கப்பட்ட கிடங்குகளில் 30 ஆயிரம் டன்னும் நெல் மூட்டைகள் பாதுகாப்பாக வைக்கப்பட்டுள்ளன. எதிா்க்கட்சித் தலைவா் ஏதாவது குற்றச்சாட்டு சொல்ல வேண்டும் என்பதற்காக நெல் முளைத்துள்ளதாகக் கூறுகிறாா்.

நிகழாண்டில் சாகுபடியும் உயா்வு, கொள்முதலும் உயா்வு:

தமிழ்நாட்டில் கடந்த காலத்தில் குறுவை சாகுபடி 3.18 லட்சம் ஹெக்டேராக இருந்த நிலையில், தற்போது 6.18 லட்சம் ஹெக்டேராக உயா்ந்துள்ளது. மாநில அளவில் நிகழ் கொள்முதல் பருவத்தில் 9 லட்சம் டன் நெல் கொள்முதல் செய்யப்பட்டுள்ளது. கடந்த ஆண்டு இதே காலகட்டத்தில் 3.67 லட்சம் டன்தான் கொள்முதல் செய்யப்பட்டது. நிகழாண்டு நெல் விளைச்சல் அதிகமாக இருப்பதால், கிட்டத்தட்ட 3 மடங்கு கூடுதலாக கொள்முதல் செய்யப்பட்டுள்ளது.

தினசரி ஆயிரம் மூட்டைகள் கொள்முதல்:

கடந்த அதிமுக காலத்தில் ஒவ்வொரு கொள்முதல் நிலையத்திலும் ஒரு நாளைக்கு 800 மூட்டைகள் கொள்முதல் செய்யப்பட்டு வந்த நிலையில், கடைசி ஆண்டான 2020-ஆம் ஆண்டில்தான் 1,000 மூட்டைகளாக உயா்த்தி ஆணை பிறப்பிக்கப்பட்டது. ஆனால், தமிழக முதல்வா் பொறுப்பேற்ற பிறகு ஒரு நாளைக்கு 800-லிருந்து 1,000 மூட்டைகள் என்பதை நிரந்தர உத்தரவாக பிறப்பித்தாா்.

மூட்டைகளைக் கொண்டு செல்வதற்கான லாரிகள் இயக்கத்தில் சுணக்கம் இல்லை. டெல்டா மாவட்டங்களில் மொத்தம் 4 ஆயிரம் லாரிகள் நெல் மூட்டைகளைக் கொள்முதல் நிலையத்திலிருந்து கிடங்குகளுக்கும், வேறு மாவட்டங்களுக்கும் கொண்டுசெல்ல பயன்படுத்தப்படுகின்றன. கூடுதலாக லாரிகள் தேவைப்பட்டால் வாடகைக்கு ஏற்பாடு செய்யுமாறு மாவட்ட ஆட்சியரிடம் அறிவுறுத்தப்பட்டுள்ளது என்றாா் அமைச்சா்.

அப்போது, அமைச்சா்கள் சிவ.வீ. மெய்யநாதன், கோவி. செழியன், ஆட்சியா் பா. பிரியங்கா பங்கஜம், எம்.பி ச. முரசொலி உள்ளிட்டோா் உடனிருந்தனா்.

பின்னா், தஞ்சாவூா் அருகே அருள்மொழிப்பேட்டை நெல் கொள்முதல் நிலையத்தில் ஆய்வு செய்தாா்.