சாலைப் பாதுகாப்பு விழிப்புணர்வு ஓட்டம்

தேசிய எலும்பு  மற்றும் மூட்டுதினத்தையொட்டி திருச்சியில் சாலைப் பாதுகாப்பு விழிப்புணர்வு மாரத்தான் ஓட்டம் ஞாயிற்றுக்கிழமை நடைபெற்றது.
தமிழ்நாடு எலும்பியல் மருத்துவர்கள் சங்கத்தின் திருச்சி கிளை மற்றும் திருச்சி ஆர்த்தோ கிளப் ஆகியவை இணைந்து நடத்திய விழிப்புணர்வு மாரத்தான் ஓட்டத்தை  தென்னூர் உழவர் சந்தையில் மாவட்ட ஆட்சியர் கு.ராசாமணி தொடக்கி வைத்தார்.இந்த ஓட்டம் புதிய நீதிமன்ற இணைப்புச் சாலை, கண்டோன்மென்ட், பாரதிதாசன் சாலை,  தலைமை அஞ்சல் நிலையம்,  குட்ஷெட் மேம்பாலப் பகுதி, டிவிஎஸ் டோல்கேட் வழியாக திருச்சி அண்ணா விளையாட்டரங்கத்தில் நிறைவடைந்தது. சுமார் 1,700 பேர் ஓட்டத்தில் பங்கேற்றனர். ஒவ்வொரு பிரிவுக்கும் 3 பேர் வீதம் முதல் 3 இடங்களைப் பெற்றவர்கள் தேர்வு செய்யப்பட்டு பரிசுகள் வழங்கப்பட்டன. மாற்றுத் திறனாளிகள் 3 பேருக்கு சிறப்புப் பரிசுகள் வழங்கப்பட்டன.
கி.ஆ.பெ.விசுவநாதம் அரசு மருத்துவக் கல்லூரி முதல்வர் ஜி. அனிதா, சுகாதாரப் பணிகள் இணை இயக்குநர் செ.சம்சாத் பேகம், கிராம சேவைகள் துணை இயக்குநர் ஆ.சுப்பிரமணி, தமிழ்நாடு எலும்பியல் மருத்துவர் சங்கத் தலைவர்  ரா.முரளிதரன், அரசு மருத்துவக் கல்லூரி எலும்பு முறிவு துறைத் தலைவர் ப. மதிவாணன், சௌடாம்பிகா கல்வி குழுமத் தலைவர்  எஸ்.ராமமூர்த்தி உள்ளிட்டோர் பங்கேற்றனர்.
முன்னதாக, எலும்பியல் மருத்துவர் சங்கத்தின் திருச்சி கிளைச் செயற்குழு உறுப்பினர் ஜோ. டெரனஸ் ஜோஸ் ஜெரோம் வரவேற்றார். திருச்சி ஆர்த்தோ கிளப் செயலர் முகேஷ் மோகன் நன்றி கூறினார்.