முக்கொம்பில் சீரமைப்புப் பணிகள் இன்று நிறைவடையும்?

திருச்சி முக்கொம்பு மேலணை கொள்ளிடம் ஆற்றில் உடைப்பு ஏற்பட்டுள்ள பகுதிகளில் மேற்கொள்ளப்பட்டு வரும் சீரமைப்புப் பணிகள் வியாழக்கிழமைக்குள் நிறைவடையும் என எதிர்பார்ப்பதாக மாநிலப் போக்குவரத்துத் துறை அமைச்சர் எம்.ஆர்.விஜயபாஸ்கர் தெரிவித்தார்.
முக்கொம்பு மேலணை கொள்ளிடம்ஆற்றில் நடைபெற்று வரும் சீரமைப்புப் பணிகளை புதன்கிழமை மாலை பார்வையிட்ட பின்னர் அவர் கூறியது: முக்கொம்பு மேலணை கொள்ளிடம் ஆற்றில் உடைப்பு சரி செய்யும் பணி தொடர்ந்து நடைபெற்று வருகிறது. இன்னும் 30 அடி தொலைவுக்குத்தான்  சரி செய்ய வேண்டிய பணிகள் உள்ளன. இப்பணி வியாழக்கிழமைக்குள் நிறைவடையும் நிலையில் உள்ளது. இரண்டு நாள்களுக்கு முன்பே பணிகள் நிறைவடையும் என எதிர்பார்க்கப்பட்டது. தண்ணீரின்வேகமும், ஆழமும் அதிகமாக உள்ளதால் இந்த இடத்தில் பெரிய பாறாங்கற்களைக் கொண்டு அடைப்பை சரி செய்யும் பணி நடைபெற்று வருகிறது. பொதுப்பணித்துறையினரும், மாவட்ட ஆட்சியரும்  இரவு பகல் பாராமல் பணியை முடுக்கிவிட்டு, விரைவாக பணிகளை முடிக்க களத்தில் இருந்து நடவடிக்கை எடுத்து வருகின்றனர்.  தமிழக முதல்வரும், துணை முதல்வரும் பணிகளின் முன்னேற்றம் குறித்து விசாரித்து வருகின்றனர். காவிரியின் கடைமடைப் பகுதிகளுக்குத் தண்ணீர் செல்வதற்கான நடவடிக்கையை அரசு மேற்கொள்ளும். புதிய பாலத்துக்கான பணிகள் குறித்து ஆய்வும்நடைபெற்று வருகிறது என்றார் விஜயபாஸ்கர்.
ஆய்வின் போது, மாவட்ட ஆட்சியர் கு.ராசாமணி, பொதுப்பணித்துறையின் திருச்சி மண்டலத் தலைமைப் பொறியாளர் ஆர். செந்தில்குமார், கண்காணிப்புப் பொறியாளர் பி.ரவிச்சந்திரன், செயற்பொறியாளர் தி.பெ. கணேசன் உள்ளிட்டோர் உடனிருந்தனர்.