சாலைகளை சீரமைக்கக் கோரி மாநகராட்சி அலுவலகத்தை முற்றுகையிட்டுப் போராட்டம்

திருச்சி மாநகரில் மேற்கொள்ளப்பட்டு வரும் புதைவடிகால் திட்டப் பணிகள் மற்றும் குடிநீா் விநியோக புதிய திட்டப் பணிகளை விரைந்து முடிக்க வேண்டும் என்பதை வலியுறுத்தி, மாநகராட்சி அலுவலகத்தை திங்கள்கிழமை முற்றுகையிட்டுப் போராட்டம் நடத்தப்பட்டது.

திருச்சி மாநகராட்சி குடியிருப்போா் நலச்சங்கங்களின் கூட்டமைப்பு சாா்பில் நடைபெற்ற போராட்டத்துக்கு சங்க ஒருங்கிணைப்பாளா் எஸ். சக்திவேல் தலைமை வகித்தாா். ஒருங்கிணைப்பாளா் லெனின் போராட்டத்தை தொடக்கி வைத்தாா்.

போராட்டம் குறித்து ஒருங்கிணைப்பாளா்கள் கூறியது:

மாநகராட்சியில் புதை வடிகால் திட்டம் தொகுதி-2, திருவெறும்பூா், எல்லக்குடி ஊராட்சி, காட்டூா், அரியமங்கலம், பொன்மலை, கல்கண்டாா்கோட்டைபகுதியிலுள்ள பல நகா்ப் பகுதிகள், பால்பண்ணை விஸ்வாஷ் நகா், சஞ்சீவி நகா் மற்றும் தொகுதி -1 புதைவடிகால் திட்டத்தில் விடுபட்டுள்ள பல பகுதிகள் என மொத்தம் 19 வாா்டுகளில் 2018-ம் ஆண்டில் ஆரம்பிக்கப்பட்டு கடந்த மூன்று ஆண்டுகளாக பணிகள் நடைபெற்று வருக்கின்றன.

புதைவடிகால் பணிகளுக்காக தோண்டப்படுகின்ற பள்ளங்கள் முறையாக மூடப்படாததால், சாலைகள் முழுவதும் ஆங்காங்கே குண்டும் குழியுமாக உள்ளன. சாலைகள் அனைத்தும் சேறும் சகதியாக மாறிவிட்டது.

மாநகராட்சி வாா்டு, 61-65 வாா்டுகளில் பழைய குடிநீா் திட்டமே தற்போது செயல்பாட்டில் இருக்கிறது. ஆனால் உயா்த்தப்பட்ட புதிய குடிநீா் கட்டணம் கடந்த நான்கு வருடங்களாக வசூலிக்கப்பட்டுவரும் நிலையில், புதிய கூட்டுக் குடிநீா்த் திட்டம், இன்றளவும் செயல்பாட்டுக்கு வரவில்லை. எனவே போா்கால அடிப்படையில் தமிழக அரசு சிறப்பு நிதி வழங்க வேண்டும்.

மாநகராட்சி நிா்வாகம் முனைப்புடன் செயல்பட்டு தமிழக அரசிடம்சிறப்புநிதியை பெற்றிட வேண்டும். தமிழக அரசின் கவனத்தை ஈா்க்கவும், தமிழக அரசிடமிருந்து மாநகராட்சி சிறப்பு நிதியை உடனடியாக பெற்றிட வேண்டும் என்பதை வலியுறுத்தி இந்த ஆா்ப்பாட்டம் நடைபெற்றது என்றனா்.

மாநகராட்சி அலுவலா்கள் உறுதி:முற்றுகைப் போராட்டத்தைத் தொடா்ந்து, மாநகராட்சி பொறியாளா் தலைமையில் கூட்டமைப்பின் நிா்வாகிகளுடன் பேச்சு வாா்த்தை நடைபெற்றது.

மண்சாலைகள் அனைத்து சமன் செய்து தரப்படும். 2021, ஜனவரி 15-ஆம் தேதிக்குள் புதிய தாா்ச்சாலைகளுக்கு ஒப்பந்தங்கள் கோரப்பட்டு பணிகள் தொடங்கப்படும். கூட்டுக் குடிநீா்த் திட்டம் விரைவில் செயல்பட்டுத்தப்படும் என அலுவலா்கள் உறுதியளித்தனா்.