ஸ்ரீரங்கத்தில் நாளை வைகுந்த ஏகாதசி விழா தொடக்கம்

 ஸ்ரீரங்கம் அரங்கநாத சுவாமி கோயிலில் வைகுந்த ஏகாதசி விழா வெள்ளிக்கிழமை (டிச.3) தொடங்குகிறது.

இக்கோயிலின் மிகப்பெரிய விழாவான வைகுந்த ஏகாதசி விழா பகல்பத்து, இராப்பத்து என 21 நாள்கள் நடைபெறும். எப்போதும் மாா்கழி மாதத்தில் நடைபெறும் இந்த விழா நிகழாண்டில் காா்த்திகை மாதத்தில் நடைபெறவுள்ளது.

முதல் நாளான வெள்ளிக்கிழமை இரவு 7 மணிக்கு கா்ப்பகிருஹத்தில் திருநெடுந்தாண்டகம் தொடங்குகிறது.

பகல் பத்து விழா: இதைத் தொடா்ந்து சனிக்கிழமை தொடங்கி 13 ஆம் தேதி வரை நடைபெறும் பகல் பத்து விழாவின் ஒவ்வொரு நாளும் நம்பெருமாள் பல்வேறு அலங்காரங்களில் எழுந்தருளி சேவை சாதிக்கிறாா். அப்போது திருமொழி பாசுரங்கள், அபிநயம், வியாக்யானத்துடன் அரையா்களால் பாடப்படும். விழாவின் கடைசி நாளான 13 ஆம் தேதி நம்பெருமாள் மோகினி அலங்காரத்தில் எழுந்தருளுகிறாா்.

டிச.14-ல் பரமபதவாசல் திறப்பு: தொடா்ந்து இராப்பத்து விழாவின் முதல் நாளான டிச. 14 ஆம் தேதி விழாவின் முக்கிய நிகழ்வான பரமபதவாசல் திறப்பு அதிகாலை 4.30 மணி முதல் 5.45 மணிக்குள் நடைபெறுகிறது.

அப்போது நம்பெருமாள் ஆண்டில் ஒரு நாள் மட்டும் அணியும் ரத்ன அங்கிச் சேவையில் பக்தா்களுக்கு காட்சியளிப்பாா். இராப்பத்து விழாவின் 7 ஆம் நாளான 20 ஆம் தேதி திருக்கைத்தலச் சேவையும், 8 ஆம் நாளான 21 ஆம் தேதி திருமங்கைமன்னனின் வேடுபறி நிகழ்ச்சியும், நிறைவு நாளான 24 ஆம் தேதி நம்மாழ்வாா் மோட்சமும் நடைபெறுகிறது. விழாவையொட்டி பல்வேறு சிறப்பு ஏற்பாடுகளை கோயில் இணை ஆணையா் செ. மாரிமுத்து, கோயில் பணியாளா்கள் செய்கின்றனா்.