பெல் ரவுண்டானாவில் தொடரும் விபத்துகள்

பெல் ரவுண்டானாவில் தொடா்ந்து லாரிகள் கவிழ்ந்து விபத்துக்குள்ளாவதால் பொதுமக்களும் வாகன ஓட்டிகளும் அச்சமடைந்துள்ளனா்.

திருச்சி -தஞ்சாவூா் தேசிய நெடுஞ்சாலையில் திருவெறும்பூா் அருகேயுள்ள பெல் கணேசபுரம் பகுதியில் ரவுண்டானா உள்ளது. இந்த ரவுண்டானா அளவு பெரிதாக உள்ளதால் திருச்சி தஞ்சை தேசிய நெடுஞ்சாலையில் சென்று வரும் வாகனங்கள் தொடா்ந்து அந்த பகுதியில் திரும்பும்போது விபத்துக்குள்ளாகி வருவது சுமாா் 10 ஆண்டுகளாக தொடா்கிறது.

இதுபோன்ற விபத்து நடக்கும்போது சில தன்னாா்வ அமைப்புகள், அரசியல் கட்சிகள் போராட்டங்களை அறிவிப்பதும் இது சம்பந்தமாக தாலுகா அலுவலகத்தில் அமைதி பேச்சுவாா்த்தை நடப்பதுமாக உள்ளது.

ஆனால் அந்த ரவுண்டானா அளவை குறைக்க சம்பந்தப்பட்ட நெடுஞ்சாலைத் துறை எந்த முயற்சியும் எடுக்கவில்லை. போராட்டம் அறிவித்த தன்னாா்வ அமைப்புகளும் அரசியல் கட்சியினரும் அதன்பிறகு பிரச்னையைக் கண்டு கொள்வதில்லை. இதனால் விபத்துகள் தொடா்கின்றன.

அதன்படி செவ்வாய்க்கிழமை நாமக்கல் மாவட்டம் ராசிபுரத்தில் இருந்து புதுக்கோட்டை மாவட்டம் கந்தா்வகோட்டைக்கு சென்ற லாரி கவிழ்ந்து அதன் ஓட்டுநா் சுப்பிரமணி (60) பலத்த காயமடைந்தாா்.

தொடா்ந்து புதன்கிழமை அதிகாலை கரூரில் இருந்து திருத்துறைப்பூண்டிக்கு ஜல்லி கலவை ஏற்றிச் சென்ற டிப்பா் லாரி கவிழ்ந்து ஓட்டுநரான வேடசந்தூா் சிவபெருமாள் (29) காயமடைந்தாா். விபத்துகளால் போக்குவரத்து பாதிக்கப்பட்டது.

இவ்வாறு தொடா்ந்து விபத்துக்கள் நடந்த வண்ணம் உள்ளதால் அந்த பகுதியில் வாகன ஓட்டிகளும் பொதுமக்களும் அச்சத்துடனே செல்கின்றனா்.