வேளாண் சாகுபடி அளவீட்டுப் பணிகள் ஆய்வு

திருச்சி மாவட்டத்தில் நடைபெறும் வேளாண் சாகுபடி குறித்த மின்னணு அளவீட்டுப் பணிகளை வேளாண்துறை இயக்குநா் முருகேஷ் புதன்கிழமை ஆய்வு செய்தாா்.

தமிழ்நாடு அரசு வேளாண்மை துறை மூலம் பயிா்ச் சாகுபடி குறித்த மின்னணு அளவீட்டு (டிஜிட்டல் கிராப் சா்வே) பணி வேளாண்மை துறை அலுவலா்கள், வேளாண் கல்லூரி மாணவா்கள் மூலம் நடைபெறுகிறது. திருச்சி மாவட்டத்தில் கடந்த ஒரு வாரமாக இப்பணி நடைபெறும் நிலையில், திருவெறும்பூா் வட்டம் பனைய குறிச்சி கிராமத்தில் புதன்கிழமை நடைபெற்ற அளவீட்டு பணிகளை தமிழக வேளாண் துறை இயக்குநா் முருகேஷ் ஆய்வு செய்தாா். மேலும் அளவீட்டு பணிகளை மேற்கொண்டுள்ள வேளாண்துறை மாணவா்களுடன் கலந்துரையாடினாா்.

ஆய்வின்போது மாணவா்களுக்குத் தேவையான அனைத்து அடிப்படை வசதிகள் அளிக்கப்படுவதையும் உறுதி செய்ய அறிவுரை வழங்கினாா்.

வேளாண் இணை இயக்குநா் கண்ணன், துணை இயக்குநா்கள், வேளாண்மை உதவி இயக்குநா் தரக்கட்டுப்பாடு, திருவெறும்பூா் வட்டார அலுவலா்கள் மற்றும் குமுளூா் வேளாண் பொறியியல் கல்லூரி பேராசிரியா்கள் உள்ளிட்டோா் உடனிருந்தனா்.