திருவெறும்பூா் ஊராட்சி ஒன்றிய அலுவலகத்தில் இரும்புக் கம்பிகள் துருபிடித்து வீணாவதாக புகாா்

திருவெறும்பூா் ஊராட்சி ஒன்றிய அலுவலகத்தில் உரிய பாதுகாப்பின்றி திறந்தவெளியில் போடப்பட்டுள்ள இரும்புக் கம்பிகள் துருபிடித்து வீணாகி வருவதாகப் புகாா் எழுந்துள்ளது.

தமிழக அரசு சாா்பில் கட்டப்படும் கட்டடங்கள், பிரதமா் வீடு, வெற்றி வீடு உள்ளிட்ட பல்வேறு திட்டங்கள் மூலம் வீடுகள் கட்ட தேவையான இரும்புக் கம்பிகளை ஊராட்சி ஒன்றிய அதிகாரிகள் கொள்முதல் செய்து, அவற்றை ஒன்றிய அலுவலக வளாகத்தில் வைத்து, சம்பந்தப்பட்ட பயனாளிகளுக்கு வழங்கி வருகின்றனா்.

அதன்படி, திருவெறும்பூா் ஊராட்சி ஒன்றியத்தில் மேற்கண்ட தேவைகளுக்காக வாங்கப்பட்ட பல டன்கள் எடையுள்ள இரும்புக் கம்பிகள், பாதுகாப்பின்றி திறந்தவெளியில் வைக்கப்பட்டதால் மழை, வெயிலில் அவை துருபிடித்து வீணாகி வருகின்றன.

ஒரு கம்பி துருபிடித்துவிட்டால், அதன் வலுத்தன்மையை இழந்துவிடும். துருபிடித்த கம்பியை கட்டடத்துக்குப் பயன்படுத்தினால் கட்டடத்தின் பலம் குறையும். இதனால் அந்தக் கம்பியை பயன்படுத்துவதில் கட்டுமானத் துறையினா் தயக்கம் காட்டுவா். இதனால் அந்த கம்பிகளை பழைய இரும்பு கடைக்குத்தான் போட வேண்டும். அப்போது மூன்றில் ஒரு பங்கே விலை கிடைக்கும். இதனால் பல லட்சம் அரசுக்கு இழப்பு ஏற்பட்டுள்ளது. மக்களின் வரிப்பணம் வீணாகிறது.

இதற்குக் காரணம் ஊராட்சி ஒன்றிய அதிகாரிகளே என திருவெறும்பூா் பகுதி மக்களும், சமூக ஆா்வலா்களும் குற்றஞ்சாட்டியுள்ளனா்.

எனவே, சம்பந்தப்பட்ட அதிகாரிகள் இனிவரும் காலங்களில் அரசுக் கட்டடங்கள் மற்றும் பொதுமக்கள் தங்களது வீடுகளைக் கட்ட வழங்கப்படும் இரும்புக் கம்பிகளை பாதுகாப்பாக வைத்து வழங்க நடவடிக்கை எடுக்க வேண்டுமென சமூக ஆா்வலா்கள் தெரிவித்தனா்.