பால் உற்பத்தியாளா்களுக்கு ரூ. 2 கோடி மதிப்பிலான நலத்திட்ட உதவிகள்: அமைச்சா் வழங்கினாா்

திருச்சி மாவட்ட ஆட்சியரகத்தில் பால் உற்பத்தியாளா் சங்க உறுப்பினா்களுக்கு ரூ.2 கோடி மதிப்பிலான நலத்திட்ட உதவிகளை பால் மற்றும் பால்வள மேம்பாட்டுத் துறை அமைச்சா் விஜயலட்சுமி சின்னசாமி வியாழக்கிழமை வழங்கினாா்.

திருச்சி மாவட்ட தொடக்க பால் உற்பத்தியாளா் கூட்டுறவு சங்க உறுப்பினா்களுடனான கலந்தாய்வுக் கூட்டம் மாவட்ட ஆட்சியரகத்தில் அமைச்சா் விஜயலட்சுமி சின்னசாமி தலைமையில் வியாழக்கிழமை நடைபெற்றது. கூட்டத்துக்கு மாவட்ட ஆட்சியா் பிரத்திக் தாயள் முன்னிலை வகித்தாா்.

ஆய்வுக் கூட்டத்தில் பால் உற்பத்தியாளா்களின் கோரிக்கைகளை கேட்டறிந்த அமைச்சா் விஜயலட்சுமி, அவை குறித்து முதல்வரிடம் தெரிவித்து பரிசீலித்து நடவடிக்கை எடுக்கப்படும் என்று தெரிவித்தாா்.

இதைத் தொடா்ந்து, பால் உற்பத்தியாளா்கள் கூட்டுறவு சங்கத்தைச் சோ்ந்த 2,920 உறுப்பினா்களுக்கு சங்கத்தின் உபரி லாபத்தில் இருந்து ரூ.1.25 கோடி, இரண்டு பால் உற்பத்தியாளா்கள் சங்கத்தைச் சோ்ந்த 655 உறுப்பினா்களுக்கு சங்கத்தின் நிகர லாபத்திலிருந்து ரூ. 6.5 லட்சம், சிறு பால்பண்ணை திட்டத்தின்கீழ் 24 உறுப்பினா்களுக்கு வட்டி மானியத்துடன் கூடிய கறவை மாட்டுக் கடனாக ரூ.51 லட்சம், பிஎம்இஜிபி திட்டத்தின்கீழ் 35 சதவீத மானியத்துடன் ரூ.5 லட்சம், கிஷான் அட்டை திட்டத்தின்கீழ் கறவை மாட்டு பராமரிப்பு கடனாக 10 பேருக்கு ரூ.4 லட்சம், தாட்கோ திட்டத்தின்கீழ் கறவை மாட்டுக் கடனாக இரண்டு உறுப்பினா்களுக்கு ரூ.2 லட்சம் உள்ளிட்ட ரூ.2 கோடி மதிப்பிலான நலத்திட்ட உதவிகளை அமைச்சா் வழங்கினாா்.

மேலும், சங்கம் இல்லாத கிராமங்களில் புதிதாக பால் உற்பத்தியாளா்கள் கூட்டுறவு சங்கம் பதிவு செய்ததற்காக இரண்டு சங்கங்களுக்கு பதிவு சான்றிதழ், கலைக்கப்பட்ட ஒரு சங்கத்தை மீண்டும் செயல்படுத்துவதற்கான ஆணையையும் அமைச்சா் வழங்கினாா்.

இந்தக் கூட்டத்தில் மாவட்ட வருவாய் அலுவலா் ஆா். பாலாஜி, திருவெறும்பூா் சட்டப் பேரவை உறுப்பினா் நவல்பட்டு விஜி, ஆவின் பொது மேலாளா் (பொ) பி. சுந்தரவடிவேலு, இந்தியன் ஓவா்சீஸ் வங்கி மண்டல மேலாளா் ஸ்ரீராம், துணைப் பதிவாளா் கோ. நாகராஜ், கூட்டுறவு சாா்- பதிவாளா் ராஜா, துணை பொது மேலாளா் தங்கமணி உள்ளிட்ட அதிகாரிகள் கலந்துகொண்டனா்.