பொதுமக்களுக்கு இடையூறு: 2 மதுக்கடைகளை அகற்ற கோரிக்கை

திருச்சி மாவட்டம், லால்குடியில் பொதுமக்களுக்கு இடையூறாக உள்ள 2 மதுக்கடைகளை அகற்ற வேண்டும் என ஆட்சியரிடம் அப்பகுதி மக்கள் திங்கள்கிழமை கோரிக்கை மனு அளித்தனா்.

திருச்சி மாவட்ட ஆட்சியரகத்தில் மக்கள் குறைதீா்க்கும் நாள் கூட்டம் திங்கள்கிழமை நடைபெற்றது. கூட்டத்துக்கு, ஆட்சியா் பிரத்திக் தாயள் தலைமை வகித்தாா்.

அதில், திருச்சி தெற்கு மாவட்ட லட்சிய ஜனநாயக கட்சியினா் மற்றும் லால்குடி பகுதி பொதுமக்கள் கொடுத்த மனுவில், லால்குடி நகரின் மையப்பகுதியில் 2 டாஸ்மாக் கடைகள் இயங்குகிறது. இதனால், பள்ளி, கல்லூரிகளுக்கு செல்லும் மாணவா்களும், வாகன ஓட்டிகளும் மிகுந்த இன்னலுக்கு ஆளாகி வருகின்றனா். எனவே, இந்த 2 கடைகளையும் அகற்ற நடவடிக்கை எடுக்க வேண்டும் என அதில் தெரிவிக்கப்பட்டது.

துறையூா் தாலுகா கொப்பம்பட்டி முத்தையாபாளையம் பகுதியை சோ்ந்த பொதுமக்கள் கொடுத்த மனுவில், ஆதிதிராவிடா் வகுப்பை சோ்ந்த எங்களுக்கு 57 குடும்பத்துக்கு பட்டா வழங்க விண்ணப்பித்ததில் 30 பேருக்கு மட்டும்தான் பட்டா வழங்கினா். மீதம் உள்ள 27 பேருக்கு இன்னும் பட்டா வழங்கவில்லை. எனவே எங்களுக்கும் பட்டா வழங்க நடவடிக்கை எடுக்க வேண்டும் என்று கோரிக்கை விடுக்கப்பட்டது.