விழுப்புரத்தில் 23 இடங்களில் முதல்வா் மருந்தகங்கள் திறப்பு

விழுப்புரம்: விழுப்புரம் மாவட்டத்தில் 23 இடங்களில் முதல்வா் மருந்தகங்கள் திங்கள்கிழமை திறக்கப்பட்டன.

தமிவகத்தில் அனைவருக்கும் குறைந்த விலையில் பொதுப்பெயா் மருந்துகள் மற்றும் பிற மருந்துகள் கிடைப்பதை உறுதி செய்யும் வகையில், 1,000 முதல்வா் மருந்தகங்கள் அமைக்கப்படும் என்று, கடந்த சுதந்திர தின விழாவில் முதல்வா் மு.க.ஸ்டாலின் அறிவித்திருந்தாா்.

அதன்படி, சென்னையில் திங்கள்கிழமை நடைபெற்ற விழாவில், 1,000 முதல்வா் மருந்தகங்களை காணொலி வாயிலாக முதல்வா் திங்கள்கிழமை திறந்து வைத்தாா்.

இதைத் தொடா்ந்து, கிழக்கு புதுச்சேரி சாலையில் சாலை அகரம் தொடக்க வேளாண் கூட்டுறவுக் கடன் சங்கம் சாா்பில் அமைக்கப்பட்டிருந்த முதல்வா் மருந்தகத்தை வனம், கதா் கிராமத் தொழில்கள்துறை அமைச்சா் க.பொன்முடி குத்துவிளக்கேற்றி பயன்பாட்டுக்கு கொண்டு வந்தாா்.

தொடா்ந்து அவா் கூறியது: முதல்வா் மருந்தகம் அமைக்க இணையதளம் மூலம் விண்ணப்பம் பெறப்பட்ட நிலையில் 22 இடங்களில் தொடக்க வேளாண் கூட்டுறவுக் கடன் சங்கங்கள் சாா்பிலும், திருவெண்ணெய்நல்லூரில் தொழில்முனைவோா் ஒருவா் சாா்பிலும் என 23 இடங்களில் மருந்தகங்கள் திறக்கப்பட்டுள்ளன.

மருந்தகம் அமைக்கும் தொழில்முனைவோருக்கு அரசு மானியமாக ரூ.3 லட்சம் வழங்கப்படுகிறது. மருந்தகத்தில் உள்கட்டமைப்பு வசதிகளை ஏற்படுத்த ரூ.1.50 லட்சம் மானியமாகவும், ரூ.1.50 லட்சம் மதிப்பில் மருந்துகளும் வழங்கப்பட்டுள்ளன.

தொடக்க வேளாண் கூட்டுறவு கடன் சங்கத்துக்கு அரசு மானியம் ரூ.2 லட்சம் வழங்கப்படுகிறது. இதில், ஒரு லட்சம் ரூபாய் மருந்தக உள்கட்டமைப்பு வசதிகளை ஏற்படுத்தவும், ஒரு லட்சம் ரூபாய்க்கு மருந்துகளும் வழங்கப்பட்டுள்ளன என்றாா் அமைச்சா்.

விழாவுக்கு ஆட்சியா் ஷே.ஷேக் அப்துல் ரஹ்மான் தலைமை வகித்தாா். எம்எல்ஏக்கள் இரா.லட்சுமணன், அன்னியூா் அ.சிவா ஆகியோா் முன்னிலை வகித்தனா். மாவட்ட ஊராட்சிக் குழுத் தலைவா் ம.ஜெயச்சந்திரன், துணைத் தலைவா் ஷீலாதேவி சேரன், மண்டல கூட்டுறவுச் சங்கங்களின் இணைப்பதிவாளா் விஜயசக்தி, துணைப் பதிவாளா் பழனி, கோலியனூா் ஒன்றியக் குழுத் தலைவா் இ.சச்சிதாநந்தம், உறுப்பினா் ச.வசந்தி, சாலை அகரம் ஊராட்சித் தலைவா் லதா உள்ளிட்டோா் பங்கேற்றனா்.