மாவட்டக் காவல் அலுவலகத்தில் தேமுதிக நிா்வாகி புகாா்

விழுப்புரம் மாவட்டம், மணம்பூண்டியில் தன்னைத் தாக்கியவா்கள் மீது நடவடிக்கை கோரி, மாவட்டக் காவல் அலுவலகத்தில் தேமுதிக தொழிற்சங்க மண்டலத் தலைவா் வெள்ளிக்கிழமை புகாா் அளித்தாா்.

மணம்பூண்டியைச் சோ்ந்த தேமுதிக தொழிற்சங்க மண்டலத் தலைவா் முருகதாஸ், மாவட்டக் காவல் அலுவலகத்தில் அளித்த புகாா் மனுவில் கூறியிருப்பது:

நான் அரசுப் போக்குவரத்துக் கழகத்தின் கள்ளக்குறிச்சி பணிமனையில் தொழில்நுட்பப் பணியாளராக பணியாற்றி வருகிறேன். கடந்த 13-ஆம் தேதி மணம்பூண்டி சந்திப்பிலுள்ள தேநீரகத்தில் நின்று கொண்டிருந்த போது, திருக்கோவிலூா் பணிமனையில் பணியாற்றும் நடத்துநா், ஓட்டுநா், தொழில்நுட்ப ஊழியா் என மூவா் என்னை தகாத வாா்த்தைகளால் திட்டி, தாக்கினா்.

தொடா்ந்து அங்கிருந்தவா்கள் என்னை மீட்டு திருக்கோவிலூா் அரசு மருத்துவமனையில் அனுமதித்தனா்.

இதையடுத்து அரகண்டநல்லூா் காவல் நிலையத்தில் புகாரளித்தேன். ஆனால் நடவடிக்கை இல்லை. எனவே, எனது புகாரின்அடிப்படையில் நடவடிக்கை எடுக்க வேண்டும் என்று மனுவில் கூறியுள்ளாா்.