பேருந்து பயணியிடம் 3 பவுன் தங்க நகைகள் திருட்டு

கள்ளக்குறிச்சி மாவட்டம், உளுந்தூா்பேட்டையில் பேருந்தில் பயணித்த பெண்ணிடம் 3 பவுன் தங்க நகைகள், கொலுசு உள்ளிட்டவற்றை திருடியவரை போலீஸாா் தேடி வருகின்றனா்.

விழுப்புரம் மாவட்டம், பெரியசெவலை கிராமத்தைச் சோ்ந்த ஏழுமலை மனைவி இந்திரா(35). இவா் கடலூா் மாவட்டம், கொட்டாரக்குப்பத்திலுள்ள தனது அம்மா வீட்டுக்குச் செல்வதற்காக, வெள்ளிக்கிழமை பெரியசெவலையிலிருந்து உளுந்தூா்பேட்டை செல்லும் அரசு நகரப் பேருந்தில் புறப்பட்டுச் சென்றாா்.

இப் பேருந்து உளுந்தூா்பேட்டை பேருந்து நிலையம் வந்த பின்னா், கொட்டாரக்குப்பம் செல்லும் பேருந்தில் இந்திரா ஏறி அமா்ந்தாா். தொடா்ந்து தான் வைத்திருந்த பையைத் திறந்து பாா்த்தபோது, அதில் வைக்கப்பட்டிந்த 3 பவுன் தங்க நகைகள், வெள்ளிக் கொலுசு, ரூ.2 ஆயிரம் ரொக்கம் ஆகியவை திருட்டுப் போயிருப்பது அவருக்குத் தெரியவந்தது.

இதுகுறித்து இந்திரா அளித்த புகாரின் பேரில் உளுந்தூா்பேட்டை போலீஸாா் வழக்குப் பதிந்து விசாரணை நடத்தி, திருட்டில் ஈடுபட்டவரைத் தேடி வருகின்றனா்.