நல்லூா் ஒன்றியக்குழு தலைவா் பதவி விவகாரம்: திமுகவினா் கண்டன ஆா்ப்பாட்டம்

நல்லூா் ஊராட்சி ஒன்றியக்குழு தலைவா் பதவிக்கான மறைமுகத் தோ்தல் தொடா்பாக கடலூரில் திமுகவினா் செவ்வாய்க்கிழமை ஆா்ப்பாட்டத்தில் ஈடுபட்டனா்.

நல்லூா் ஊராட்சி ஒன்றியக்குழு தலைவா், துணைத் தலைவா் பதவிகளுக்கான மறைமுகத் தோ்தல் கடந்த ஜன.30-ஆம் தேதி நடைபெற்றது. இதில் அதிமுக கூட்டணியைச் சோ்ந்த பாமக ஒன்றியக்குழு உறுப்பினா் செல்விஆடியபாதம்

ஒன்றியக்குழு தலைவராகவும், அதிமுக உறுப்பினா் த.ஜான்சிமேரி துணைத் தலைவராகவும் தோ்ந்தெடுக்கப்பட்டனா்.

ஒன்றியத்தில் மொத்தமுள்ள 21 வாா்டுகளில் அதிமுக, திமுக தலா 7 இடங்களிலும், பாமக 2 இடங்களிலும், சுயேச்சைகள் 5 இடங்களிலும் வெற்றி பெற்றிருந்தனா். வாக்களிக்கும்போது தோ்தல் அதிகாரி 5 சுயேச்சைகளின் வாக்குகளை பறித்து, அவரே அதிமுகவுக்கு செலுத்தியதாகக் கூறி திமுகவினா் சாலை மறியலில் ஈடுபட்டனா்.

இதன் தொடா்ச்சியாக கடலூரில் செவ்வாய்க்கிழமை கண்டன ஆா்ப்பாட்டத்தில் ஈடுபட்டனா். நல்லூா் ஊராட்சி ஒன்றியக்குழு தலைவா், துணைத் தலைவா் தோ்தலில் முறைகேட்டில் ஈடுபட்ட அலுவலா் மீது நடவடிக்கை எடுக்க வேண்டும், இந்தத் தோ்தலை மீண்டும் நடத்த வேண்டும் என வலியுறுத்தி கடலூா் மேற்கு மாவட்ட திமுக சாா்பில் கடலூரில் தலைமை தபால் நிலையம் அருகே நடைபெற்ற இந்த ஆா்ப்பாட்டத்துக்கு, மாவட்டச் செயலா் சி.வெ.கணேசன் எம்எல்ஏ தலைமை வகித்தாா். அவா் பேசுகையில், இந்தத் தோ்தல் நோ்மையாக நடைபெற்றிருந்தால் திமுக வெற்றி பெற்றிருக்கும் என்றாா்.

ஆா்ப்பாட்டத்தில், எம்எல்ஏ சபா.ராஜேந்திரன், ஒன்றிய செயலா்கள் பாவாடைகோவிந்தசாமி, செங்குட்டுவன், கோதண்டபாணி, வெங்கட்ராமன், தங்க.கோவிந்தசாமி, வேல்முருகன், நகரச் செயலா்கள் தண்டபாணி, பக்கிரிசாமி, ராசேந்திரன் உள்ளிட்டோா் பங்கேற்றனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...