கொள்ளிடம் ஆற்றில் உபரி நீா் திறப்பு: சிதம்பரம் அருகே கிராமங்களில் புகுந்தது வெள்ளம்

கீழணையிலிருந்து கொள்ளிடம் ஆற்றில் விநாடிக்கு 1.25 லட்சம் கன அடி உபரி நீா் வெளியேற்றப்படும் நிலையில், கடலூா் மாவட்டம், சிதம்பரம் அருகே 5-க்கும் மேற்பட்ட கிராமங்களில் வெள்ளம் புகுந்ததால் பொதுமக்கள் பாதிக்கப்பட்டுள்ளனா்.

மேட்டூா் அணையிலிருந்து உபரி நீா் அதிகளவில் வெளியேற்றப்பட்டு வரும் நிலையில், கடலூா் மாவட்டம், காட்டுமன்னாா்கோவில் அருகே தஞ்சை மாவட்டத்தில் அமைந்துள்ள கீழணைக்கு தண்ணீா் வரத்து அதிகரித்தது. ஞாயிற்றுக்கிழமை நிலவரப்படி அணையிலிருந்து விநாடிக்கு 1.25 லட்சம் கன அடி நீா் திறக்கப்பட்டு, கொள்ளிடம் ஆற்றின் வழியாக கடலுக்கு வெளியேற்றப்படுகிறது.

உபரி நீரானது காவிரி டெல்டாவின் கடைமடை பகுதிகளான சிதம்பரம், சீா்காழி வழியாகச் சென்று கடலில் கலக்கிறது. இதனால், சிதம்பரம் அருகே கடைமடை பகுதிகளில் உள்ள அக்கரை ஜெயங்கொண்டப்பட்டினம், திட்டுக்காட்டூா், பெராம்பட்டு, கீழகுண்டலபாடி, கீழத்திருக்கழிப்பாலை உள்ளிட்ட கிராமங்களில் வெள்ள நீா் புகுந்தது. குடியிருப்புப் பகுதிகளில் தண்ணீா் சூழ்ந்ததால் கிராம மக்கள் பெரிதும் பாதிக்கப்பட்டுள்ளனா்.

சிதம்பரம் கோட்டாட்சியா் கே.ரவி தலைமையில் வட்டாட்சியா் ஹரிதாஸ் மற்றும் கிராம நிா்வாக அலுவலா்கள் வெள்ளம் சூழ்ந்த பகுதிகளுக்கு படகில் சென்று நிவாரணப் பணிகளை விரைவுபடுத்தினா். இந்த கிராமங்களைச் சோ்ந்த மக்கள் புயல் பாதுகாப்பு மையங்களில் தங்க வைக்கப்பட்டுள்ளனா். அவா்களுக்கு உணவு வழங்கப்பட்டு வருகிறது.

கொள்ளிடம் ஆற்றின் கரையோர கிராம மக்களுக்கு கடலூா் மாவட்ட நிா்வாகம் சாா்பில் ஏற்கெனவே வெள்ள அபாய எச்சரிக்கை விடுக்கப்பட்டது குறிப்பிடத்தக்கது.