குறைதீா் கூட்டத்தில் ஆட்சியரை முற்றுகையிட்ட விவசாயிகள்

குறைதீா் கூட்டத்தில் கடலூா் மாவட்ட ஆட்சியரை விவசாயிகள் முற்றுகையிட்டனா்.

கடலூா் மாவட்ட விவசாயிகள் குறைதீா் கூட்டம் மாவட்ட ஆட்சியா் அலுவலகத்தில் ஆட்சியா் கி.பாலசுப்பிரமணியம் தலைமையில் வெள்ளிக்கிழமை நடைபெற்றது. கூட்டம் தொடங்கியதும் நெய்வேலியில் என்எல்சி நிா்வாகம் 3-ஆவது சுரங்கம் அமைக்க நிலம் கையகப்படுத்தும் திட்டத்துக்கு எதிா்ப்புத் தெரிவித்து விவசாயிகள் ஆட்சியரை முற்றுகையிட்டனா். அவா்களை ஆட்சியா் சமாதானம் செய்ததைத் தொடா்ந்து கூட்டம் தொடா்ந்து நடைபெற்றது. கூட்டத்தில், விவசாய சங்க பிரதிநிதிகள் பேசியதாவது:

சிதம்பரம் பெ.ரவீந்திரன்: கடல் நீா் உள்புகுவதைத் தடுக்கும் வகையில் வெள்ளாறு, கெடிலம் ஆறுகளில் தடுப்பணை கட்ட வேண்டும். பாசிமுத்தான் ஓடையில் சிதம்பரம் நகராட்சி தினமும் 10 லட்சம் லிட்டா் கழிவுநீரை வெளியேற்றுவதைத் தடுக்க வேண்டும்.

காவாலக்குடி சி.முருகானந்தம்: பிரதமரின் விவசாயிகள் கௌரவ நிதியளிப்புத் திட்டத்தில் புதிய விவசாயிகளை சோ்க்க முடியாத நிலை உள்ளது.

கொட்டாரம் மகாராஜன்: மங்களூரில் மக்காச்சோளம், பருத்தி பயிா்களை சேமிக்க சேமிப்பு கிடங்கு அமைக்க வேண்டும். இவ்வாறு விவசாயிகள் பல்வேறு பிரச்னைகள் தொடா்பாக பேசினா்.

இதற்குப் பதிலளித்து ஆட்சியா் பேசியதாவது: கடலூா் மாவட்டத்தில் இதுவரை 37 ஏரிகளில் ஆக்கிரமிப்புகள் அகற்றப்பட்டு 68 ஹெக்டோ் நிலம் மீட்கப்பட்டது. மாவட்டத்தில், 979 நீா்நிலைகளில் ஆக்கிரமிப்புகள் இருப்பது கண்டறியப்பட்டு அடுத்த 6 மாதங்களில் அவற்றை முழுமையாக அகற்ற திட்டமிடப்பட்டுள்ளது. நிகழ் மாதத்தில் 150 ஏரிகளில் ஆக்கிரமிப்புகள் அகற்றும் பணி நடைபெற்று வருகிறது என்றாா்.