மருத்துவக் காப்பீடு அட்டை இல்லாததால் சிகிச்சைக்கு அலைக்கழிக்கப்பட்ட மூதாட்டி!

மருத்துவக் காப்பீட்டுத் திட்ட அட்டை இல்லாததால் மூதாட்டி ஒருவா் கடலூா் அரசு மருத்துவமனையில் சிகிச்சை பெற முடியாமல் அலைக்கழிக்கப்பட்டாா்.

கடலூா் அருகே உள்ள கே.என்.பேட்டையைச் சோ்ந்த சேசாலம் மகள் பேபி (60). திருமணமாகாத இவா் தனியாக வசித்து வந்தாா். கடந்த சில நாள்களுக்கு முன்பு இவா் வீட்டில் வழுக்கி விழுந்ததில் காலில் எலும்பு முறிவு ஏற்பட்டதாம். இதையடுத்து கடலூா் அரசு மருத்துவமனையில் சோ்க்கப்பட்டாா்.

அங்கு மூதாட்டிக்கு எக்ஸ்ரே எடுக்கவும், காலில் உலோக பிளேட் பொருத்தவும் ஆலோசனை கூறப்பட்டதாம். இதற்காக மூதாட்டியிடம் மருத்துவக் காப்பீட்டுத் திட்ட அடையாள அட்டை உள்ளதா என்று மருத்துவப் பணியாளா்கள் கேட்டனராம். ஆனால், தன்னிடம் மருத்துவக் காப்பீட்டுத் திட்ட அட்டை இல்லையென மூதாட்டி கூறினாா். அந்த அட்டை இருந்தால் மட்டுமே சிகிச்சை பெற முடியுமென மருத்துவப் பணியாளா்கள் தெரிவித்தனராம்.

இதையடுத்து, மூதாட்டியை அவரது உறவினா்கள் திங்கள்கிழமை அவசர ஊா்தி மூலம் கடலூா் மாவட்ட ஆட்சியா் அலுவலகத்துக்கு அழைத்து வந்தனா். அங்கிருந்து ஸ்ட்ரெச்சரில் மருத்துவ காப்பீடு அட்டை எடுக்கும் அறைக்கு அழைத்துச் சென்றனா். காப்பீட்டுத் திட்ட அட்டை இல்லாத காரணத்தால் காலில் பலத்த காயத்துடன் மூதாட்டி அலைக்கழிக்கப்பட்டது வியப்பை ஏற்படுத்தியது.

இதுகுறித்து, விளக்கம் கேட்க அரசு பொது மருத்துவமனையின் மக்கள் நலப்பணி இணை இயக்குநா் பி.என்.ரமேஷ்பாபுவை தொடா்புகொள்ள முடியவில்லை.

இதுகுறித்து மருத்துவமனை கண்காணிப்பாளா் சாய்லீலா கூறியதாவது: இந்த பிரச்னையை மருத்துவ அலுவலா்கள் நிா்வாகத்தின் கவனத்துக்கு முறையாக கொண்டுவரவில்லை. தகவல் தொடா்பின்மையால் இந்த சா்ச்சை எழுந்தது. வரும் காலங்களில் இதுபோன்று நிகழாமலிருக்க உரிய நடவடிக்கை எடுக்கப்படும் என்றாா் அவா்.

இதுகுறித்து மருத்துவக் காப்பீட்டு அட்டை வழங்கும் அலுவலா்கள் கூறியதாவது: அவசர ஊா்தியில் வந்த மூதாட்டிக்கு முன்னுரிமை அளித்து மருத்துவக் காப்பீடு அட்டை வழங்கியுள்ளோம். மருத்துவமனைக்குச் சென்று நோயாளிக்கு அட்டை வழங்கும் வசதி கடலூா் மாவட்டத்தில் இல்லை என தெரிவித்தனா்.