கரும்பில் பொக்கோ போயங் நோய் தாக்குதல்: வேளாண் துறை அறிவுரை

கரும்பில் பொக்கோ போயங் நோய் தாக்குதல் மேலாண்மை குறித்து பண்ருட்டி வட்டார வேளாண் உதவி இயக்குநா் பாா்த்தசாரதி அறிவுரை வழங்கினாா்.

இதுகுறித்து அவா் வியாழக்கிழமை வெளியிட்ட செய்திக் குறிப்பு: பண்ருட்டி வட்டாரத்தில் சுமாா் 1,200 ஹெக்டோ் நிலப் பரப்பில் கரும்பு சாகுபடி செய்யப்படுகிறது. தற்போது கரும்பு பயிரில் பொக்கோ போயங் என்ற நோயின் தாக்குதல் ஆங்காங்கே தென்படுகிறது. பொக்கோ போயங் என்பதன் பொருள் உருமாறிய அல்லது உருக்குலைந்த மேல் பாகம் என்பதாகும்.

இந்த நோயானது கரும்பு பயிரில் முதலில் இளம் குருத்து பகுதியைப் பாதிக்கும். பின்னா், படிப்படியாக தண்டு வரை ஊடுருவி, அதன் திசுக்களை பாதித்து மகசூல் இழப்பை ஏற்படுத்தும். தற்போது நிலவி வரும் சீதோஷன நிலையில், இந்த நோய் தாக்கம் அதிகரிக்கும் வாய்ப்புள்ளது.

இந்த நோய் தாக்கினால், கரும்பு இலையின் மேல் பகுதி அழுகல் மற்றும் தண்டில் கத்தி வெட்டு போன்ற அறிகுறிகள் காணப்படும். அந்தக் கரும்புகளை பிடுங்கி அகற்றிட வேண்டும். கரும்பு நடவு செய்த 3 மாதத்தில் இருந்து நோய்கள் தாக்கக்கூடிய மற்றும் பரவக்கூடிய வாய்ப்பு இருப்பதால், நோய்களை பரப்பும் பூஞ்சானங்கள், மாவு பூச்சிகளை கட்டுப்படுத்த ஒரு லிட்டா் தண்ணீருக்கு 2 மில்லி புரோப்பிகோனசோல் மற்றும் 1 மில்லி இமிடாகுளோா்பிட் போன்றவற்றை ஒரு மில்லி ஒட்டும் திரவத்துடன் கலந்து, ஏக்கருக்கு 200 லிட்டா் திரவக் கரைசலை 15 நாள்களுக்கு ஒரு முறை மூன்று தடவை தெளிக்க வேண்டும். நோய் காணப்பட்டவுடன் 1 கிராம் காா்பன்டசிம் அல்லது 2 கிராம் காப்பா் ஆக்ஸிகுளோரைடு ஆகியவற்றில் ஏதாவது ஒன்றை இரண்டு அல்லது மூன்று முறைகள் 15 நாள்கள் இடைவெளியில் தெளித்தும் கட்டுப்படுத்தலாம் என்று தெரிவித்தாா்.