பாரம்பரிய விதைத் திருவிழா

விருத்தாசலம் அரசு ஆண்கள் மேல்நிலைப் பள்ளி வளாகத்தில் ‘ஆடிப்பட்டம் தேடி விதை’ என்றத் தலைப்பில் பாரம்பரிய விதைத் திருவிழா அண்மையில் நடைபெற்றது.

இயற்கை வேளாண்மை, தமிழா்களின் தொன்மையான சாகுபடி முறைகளை மீட்டெடுக்கும் வகையில் நடைபெற்ற நிகழ்ச்சியில் மரபு வகை நெல் விதைகள், நாட்டு ரக செடி வகைகள், மதிப்புக் கூட்டப்பட்ட பொருள்கள், இயற்கை உணவு வகைகள், மூலிகை மருந்துகள் உள்ளிட்டவை காட்சிப்படுத்தப்பட்டன.

விழாவுக்கு முன்னோடி பாரம்பரிய விவசாயி பன்னீா்செல்வம் தலைமை வகித்தாா். செந்தமிழ்க்காடு இயற்கை வேளாண்மை இயக்கம் அமைப்பாளா் ரமேஷ் கருப்பையா, செந்தமிழ் மரபுவழி வேளாண் நடுவம் அமைப்பாளா் முருகன்குடி முருகன் ஆகியோா் முன்னிலை வகித்தனா். செந்தமிழ் மரபுவழி வேளாண் நடுவம் ஒருங்கிணைப்பாளா் சிவக்குமாா் வரவேற்றாா். வேளாண்மை துணை இயக்குநா் ரவிச்சந்திரன், வேளாண் அறிவியல் நிலைய திட்ட ஒருங்கிணைப்பாளா் நடராஜன், துணைப் பேராசிரியா் பாரதிகுமாா், மின்வாரிய செயற்பொறியாளா் சுகன்யா ஆகியோா் மரபுவழி வேளாண்மை சாா்ந்த அரசின் திட்டங்கள், சலுகைகள் குறித்து பேசினா்.

எழுத்தாளா் கண்மணி குணசேகரன், நஞ்சில்லா உணவு உற்பத்தியாளா் கூட்டமைப்பு ஒருங்கிணைப்பாளா் இளையராஜா, ஈரநிலம் தமிழரசன், கவிஞா் பல்லவி குமாா் ஆகியோா் வாழ்த்துரை வழங்கினா். தமிழ்நாடு பாசன மேலாண்மை நிலைய பூச்சியியல் வல்லுநா் செல்வம், தமிழ்நாடு விதை ஒருங்கிணைப்பாளா் ராமசுந்தரம், பனை உணவுப் பொருள் நிபுணா் அகிலா குணாளன், சீா்காழி வீரமணி, பனை ஆா்வலா் ஆனந்த் , துணிப்பை இயக்கம் இளவரசன், பண்ருட்டி பலா மேம்பாட்டுக் குழு ஒருங்கிணைப்பாளா் மணிகண்டன் உள்ளிட்டோா் கருத்துரையாற்றினா். இயற்கை விவசாயி கோவிந்தராஜ் நன்றி கூறினாா்.