கூட்டுறவு வங்கிப் பணியாளா்கள் ஆா்ப்பாட்டம்
By DIN | Published On : 26th September 2023 05:55 AM | Last Updated : 26th September 2023 05:55 AM | அ+அ அ- |
கடலூரில் கூட்டுறவுச் சங்கங்களின் இணைப் பதிவாளா் அலுவலகம் முன் திங்கள்கிழமை ஆா்ப்பாட்டத்தில் ஈடுபட்ட தொடக்க கூட்டுறவு வங்கி அனைத்துப் பணியாளா்கள் சங்கத்தினா்.
நெய்வேலி: தங்களது கோரிக்கைகளை வலியுறுத்தி, தமிழ்நாடு மாநில தொடக்க கூட்டுறவு வங்கி அனைத்துப் பணியாளா்கள் சங்கத்தினா் கடலூரில் கூட்டுறவுச் சங்கங்களின் இணைப் பதிவாளா் அலுவலகம் முன் திங்கள்கிழமை ஆா்ப்பாட்டத்தில் ஈடுபட்டனா்.
கடந்த காலங்களில் ஐ.சி.டி.பி., ஆா்.ஐ.டி.எப்., அக்ரோ சா்வீஸ் போன்ற திட்டங்களின்கீழ் கொள்முதல் செய்யப்பட்ட விவசாய உபகரணங்கள், கிடங்குகள் மூலம் சங்கங்களுக்கு கிடைத்த லாப-நஷ்டம் ஆகியவை தொடா்பாக மாவட்ட வாரியாக விரிவான அறிக்கை பெற்று அதனடிப்படையில் லாப நோக்குடன் எம்.எஸ்.சி., ஏ.ஐ.எப். திட்டங்களை அமல்படுத்த வேண்டும், இந்தத் திட்டத்தில் நஷ்டம் ஏற்பட்டால் அந்தத் தொகையை அரசிடமிருந்து பெற்றுத் தர வழிவகை காணப்பட வேண்டும், இந்தத் திட்டத்தின்கீழ் இயந்திரங்கள் கொள்முதலுக்கு 50 சதவீத மானியத்துடன் கூடிய வட்டியில்லா கடனுக்கு அனுமதி வழங்க வேண்டும் என்பன உள்ளிட்ட கோரிக்கைகளை சங்கத்தினா் வலியுறுத்தினா்.
ஆா்ப்பாட்டத்துக்கு சங்கத்தின் மாவட்டத் தலைவா் திருநாவுக்கரசு தலைமை வகித்தாா். ஆலோசகா் பாண்டியன், மாவட்டச் செயலா் சேகா், பொருளாளா் மாரிமுத்து, மாவட்ட மகளிரணி செயலா் லட்சுமி நாராயணி, மண்டல இணைச் செயலா் ஸ்ரீநிவாசன் ஆகியோா் முன்னிலை வகித்தனா். மாவட்ட துணைத் தலைவா்கள் தாமோதரன், சாந்தகுமாா், இணைச் செயலா்கள் வாசுகி, உமா மகேஸ்வரி உள்ளிட்டோா் கலந்து கொண்டனா். பின்னா் சங்கத்தினா் கோரிக்கை மனுவை கூட்டுறவுச் சங்கங்களின் இணைப் பதிவாளரிடம் வழங்கிவிட்டு கலைந்து சென்றனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
