தமிழகத்தில் மனித சக்தியின்றி விவசாயம்: அமைச்சா் எம்.ஆா்.கே.பன்னீா்செல்வம்

தமிழகத்தில் மனித சக்தியின்றி இயந்திரங்கள் மூலம் குறைந்த செலவில் விவசாயம் மேற்கொள்ள நடவடிக்கை எடுக்கப்படும் என்று வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் தெரிவித்தாா்.

சிதம்பரம் நகராட்சி அலுவலக கூட்டரங்கில் கொள்ளிடம் கூட்டுக் குடிநீா் திட்டப் பணிகள் மற்றும் சிதம்பரம் நகராட்சிக்குள்பட்ட பகுதிகளில் நடைபெறும் வளா்ச்சி திட்டப் பணிகள் குறித்து துறை சாா்ந்த அலுவலா்களுடனான ஆய்வுக்கூட்டம் செவ்வாய்க்கிழமை நடைபெற்றது.

கூட்டத்துக்கு, அமைச்சா் எம்.ஆா்.கே.பன்னீா்செல்வம் தலைமை வகித்தாா். மாவட்ட ஆட்சியா் சிபி.ஆதித்யா செந்தில்குமாா் முன்னிலை வகித்தாா். கூட்டத்தில், சிதம்பரம் நகராட்சி, அண்ணாமலை நகா் பேரூராட்சி மற்றும் குமராட்சி, பரங்கிப்பேட்டை ஒன்றியங்களைச் சோ்ந்த 10 ஊராட்சிக்குள்பட்ட 36 ஊரக குடியிருப்புகளுக்கு கூட்டுக் குடிநீா் திட்டப் பணிகள் குறித்தும், சிதம்பரம் நகராட்சி பகுதிகளில் நடைபெறும் வளா்ச்சித் திட்டப் பணிகளான சிதம்பரம் பேருந்து நிலையம், சிதம்பரம் புறவழிச்சாலை, காய்கறி அங்காடி உள்ளிட்ட பல்வேறு பணிகளின் முன்னேற்றம் குறித்து அமைச்சா் ஆய்வுசெய்ததுடன், பணிகளை விரைந்து முடிக்க வேண்டும் என்று அலுவலா்களுக்கு அறிவுறுத்தினாா்.

பின்னா், செய்தியாளா்களிடம் அவா் கூறியதாவது: சிதம்பரம் நகராட்சி, அண்ணாமலை நகா் பேரூராட்சி மற்றும் 10 ஊராட்சிகளில் சுமாா் ரூ.252 கோடியில் நடைபெற்று வரும் கொள்ளிடம் கூட்டுக் குடிநீா் திட்டப் பணிகள் குறித்து ஆய்வு மேற்கொள்ளப்பட்டது. சிதம்பரம் சுற்றியுள்ள பகுதிகளில் 42 சதவீதம் கூட்டுக் குடிநீா் திட்டப் பணிகள் நிறைவு பெற்றுள்ளது. 2025 மாா்ச் மாதத்துக்குள் பணிகளை முழுமையாக முடிக்குமாறு ஆய்வுக்கூட்டத்தில் அறிவுறுத்தப்பட்டுள்ளது. சிதம்பரம் நகராட்சியில் ரூ.300 கோடிக்கு மேல் திட்டப் பணிகள் நடைபெற்று வருகிறது.

ஆஸ்திரேலியா சுற்றுப்பயணத்தின் போது, அங்கு மேற்கொள்ளப்படும் வேளாண் முறைகள், விவசாயிகள் லாபம் ஈட்டும் தொழில்நுட்பம், குறைந்த செலவில் பயிா் செய்யும் முறைகள் குறித்து மக்களிடமும், பல்கலைக்கழக விஞ்ஞானிகளுடன் கேட்டறிந்தேன். மேலும், மனித சக்தியின்றி இயந்திர முறையில் குறைந்த செலவில் விவசாயம் மேற்கொள்ளும் முறை குறித்தும் தெரிந்து கொண்டேன். இதை, தமிழ்நாட்டில் நடைமுறை படுத்த நடவடிக்கை மேற்கொள்ளப்படும் என்றாா்.

தொடா்ந்து, சிதம்பரம் நகராட்சிப் பகுதியில் கூட்டுக் குடிநீா் திட்டத்தின் வாயிலாக மின்நகா் பகுதியில் குடிநீா் குழாய் அமைக்கும் பணிகளை அமைச்சா் எம்.ஆா்.கே.பன்னீா்செல்வம் ஆய்வு செய்தாா்.

ஆய்வின்போது, உதவி ஆட்சியா் ராஷ்மிராணி, நகா்மன்ற தலைவா் கே.ஆா்.செந்தில்குமாா், ஆணையா் டி.மல்லிகா, மாவட்ட திட்டக்குழு உறுப்பினா் த.ஜேம்ஸ் விஜயராகவன், நகா்மன்ற துணைத் தலைவா் ம.முத்துக்குமாா், நகா்மன்ற உறுப்பினா்கள் அப்புசந்திரசேகா், ஏஆா்சி.மணிகண்டன் உள்ளிட்டோா் உடனிருந்தனா்.