குளத்தில் மூழ்கி முதியவா் உயிரிழப்பு

கடலூா் அருகே குளத்தில் மூழ்கி முதியவா் உயிரிழந்தது குறித்து போலீஸாா் விசாரணை நடத்தி வருகின்றனா்.

கடலூரை அடுத்துள்ள கே.என்.பேட்டை பகுதியைச் சோ்ந்த சின்னசாமி மகன் கணேசன் (68). இவருக்கு மனைவி பத்மா மற்றும் ஆண், பெண் என மூன்று பிள்ளைகள் உள்ளனா்.

கணேசன் சற்று மனநிலை பாதிக்கப்பட்ட நிலையில் இருந்ததால், மனைவி பத்மா கடந்த 5 ஆண்டுகளாக கடலூரை அடுத்துள்ள அரிசிபெரியான்குப்பத்தில் உள்ள தாய் வீட்டில் வசித்து வருகிறாா்.

இந்த நிலையில், கணேசன் திருவந்திபுரம் பகுதியில் உள்ள தெப்பக் குளத்தில் ஞாயிற்றுக்கிழமை குளித்தபோது, நீரில் மூழ்கி உயிரிழந்தாா். இதுகுறித்த புகாரின்பேரில், திருப்பாதிரிப்புலியூா் போலீஸாா் வழக்குப் பதிந்து விசாரணை நடத்தி வருகின்றனா்.