வாக்காளா் பட்டியலில் பெயா் சோ்க்கசிறப்பு முகாம்: கடலூா் மாவட்டத்தில் ஏராளமானோா் மனு அளிப்பு!

கடலூா் மாவட்டத்தில் வாக்காளா் பட்டியலில் பெயா் சோ்க்க, நீக்க மற்றும் முகவரி மாற்றம் செய்வதற்கான முகாம் சனிக்கிழமை நடைபெற்ற நிலையில் ஏராளமானோா் படிவங்களை வாங்கி அவற்றை பூா்த்தி செய்து அதிகாரிகளிடம் சமா்ப்பித்தனா்.

கடலூா் மாவட்டத்தில் வாக்காளா் பட்டியல் சிறப்பு தீவிர திருத்தப் பணிகள் நிறைவுற்று,வரைவு வாக்காளா் பட்டியல் 19.12.2025-இல் வெளியிடப்பட்டது. இந்த பட்டியலில் கடலூா் மாவட்டத்தில் உள்ள 9 சட்டப்பேரவைத் தொகுதிகளில் 9,60,645 ஆண்கள், 9,85,832 பெண்கள், 282 மூன்றாம் பாலித்தனவா் என மொத்தம் 19,46,759 வாக்காளா்கள் இடம் பெற்றுள்ளனா்.

இந்த நிலையில் முகவரி மாறியவா்கள் , 18 வயது பூா்த்தி அடைந்த புதிய வாக்காளா்கள், விடுபட்டவா்கள், தங்கள் பெயா்களை சோ்க்க, நீக்க ஏதுவாக, புதிய வாக்காளா்கள் பெயா் சோ்த்தல், திருத்தம், முகவரி மற்றும் புகைப்படம் மாற்றம் ஆகியவற்றிற்கான முகாம்கள் 27.12.2025, 28.12.2025, 3.1.2026 மற்றும் 4.1.2026 ஆகிய தேதிகளில் 9 தொகுதிகளில் உள்ள 2,590 வாக்குச்சாவடி மையங்களில் நடைபெறுகிறது.

முதல் நாளான சனிக்கிழமை கடலூா் மாவட்டம், சிதம்பரம், புவனகிரி, குறிஞ்சிப்பாடி மற்றும் கடலூா் ஆகிய வட்டங்களில் சிறப்பு முகாம்களில் ஏராளமானோா் கலந்து கொண்டு புதிதாக பெயா் சோ்க்க படிவம் 6-ஐயும், முகவரி மாற்றி புதிய தொகுதியில் பெயா் சோ்க்க படிவம் 8-ஐயும் வாங்கி பூா்த்தி செய்து கொடுத்தனா்.

இந்த முகாம் நடைபெற்ற இடங்களில், மாவட்ட ஆட்சியா் சிபி ஆதித்யா செந்தில்குமாா் சனிக்கிழமை பாா்வையிட்டு ஆய்வு செய்தாா்.

பின்னா் அவா் தெரிவித்ததாவது: சிதம்பரம் வட்டம், பெரியப்பட்டு மற்றும் சம்பந்தம் ஊராட்சி ஒன்றிய நடுநிலைப் பள்ளி, பி.முட்லூா் அரசு மேல்நிலைப் பள்ளி. புவனகிரி வட்டம் , புவனகிரி ஊராட்சி ஒன்றிய நடுநிலைப் பள்ளி, மேல்புவனகிரி அரசு ஆண்கள் மேல்நிலைப் பள்ளி, மேலமணக்குடி ஊராட்சி ஒன்றிய நடுநிலைப் பள்ளி. குறிஞ்சிப்பாடி வட்டம், குறிஞ்சிப்பாடி அரசினா் ஆண்கள் மற்றும் பெண்கள் மேல்நிலைப் பள்ளி, வடலூா் வள்ளலாா் குருகுல மேல்நிலைப் பள்ளி. கடலூா் வட்டம், கடலூா் முதுநகா், வேளாண் ஒழுங்குமுறை விற்பனைக் கூடம், மஞ்சக்கப்பம் புனித வளனாா் மேல்நிலைப் பள்ளி ஆகிய வாக்கச்சாவடி மையங்களில் சனிக்கிழமை நடைபெற்ற வாக்காளா் பட்டியல் சிறப்பு தீவிர திருத்த முகாம் ஆய்வு மேற்கொள்ளப்பட்டது.

மேலும், பொதுமக்கள் புதிய வாக்காளா்கள் பெயா் சோ்த்தல், திருத்தம், முகவரி மற்றும் புகைப்படம் மாற்றம் ஆகியவற்றிற்கு விண்ணப்பங்களை இணையதளங்களில் சமா்ப்பிக்கலாம். பொதுமக்களிடமிருந்து பெறப்படும் விண்ணப்பங்கள் சம்பந்தப்பட்ட அலுவலா்கள் மூலமாக விசாரணைகள் மேற்கொண்டு வரும் 17.2.2026 அன்று வெளியிடப்படவுள்ள இறுதி வாக்காளா் பட்டியலில் பெயா் சோ்க்க நடவடிக்கை மேற்கொள்ளப்படும் என தெரிவித்தாா்.

சிதம்பரத்தில்....

இதுபோன்று சிதம்பரம் பகுதியிலும் வாக்காளா் பட்டியலில் பெயா் சோ்ப்பதற்கான முகாம்களில் ஏராளமானோா் முதல் நாளிலேயே படிவங்களை வாங்கி பூா்த்தி செய்து அளித்தனா். இந்த முகாம்களை மாவட்ட ஆட்சியா் சிபி ஆதித்யா செந்தில்குமாா் நேரில் பாா்வையிட்டு ஆய்வு செய்தாா்.

ஆய்வின் போது சிதம்பரம் உதவி ஆட்சியா் கிஷன்குமாா், தனித்துணை ஆட்சியா் (முத்திரைத்தாள்) தனலட்சுமி, மாவட்ட வழங்கல் அலுவலா் குமாரராஜா, மாநகராட்சி ஆணையாளா் முஜிபூா் ரஹ்மான், கடலூா் வருவாய் கோட்டாட்சியா் சுந்தரராஜன், வட்டாட்சியா்கள் கீதா, அன்பழகன், விஜய் ஆனந்த், மகேஷ் உட்பட பலா் கலந்து கொண்டனா்.