மனிதன் வாழ்வின் அடித்தளம் அமைப்பது கல்வி. அமைச்சா் சி.வெ.கணேசன்

நெய்வேலி: சமூகத்தில் மனிதன் வாழ்வின் அடித்தளம் அமைப்பது கல்வி என்று, தமிழக தொழிலாளா் நலன் மற்றும் திறன் மேம்பாட்டுத்துறை அமைச்சா் சி.வெ.கணேசன் கூறினாா்.

கடலூா் மாவட்டம், விருத்தாசலம் கொளஞ்சியப்பா் அரசு கலைக்கல்லூரியில் திங்கள்கிழமை பட்டமளிப்பு விழா நடைபெற்றது.விழாவிற்கு கல்லூரி முதல்வா் முனியன் தலைமை வகித்தாா். கடலூா் மக்களவை உறுப்பினா் எம்.கே.விஷ்ணு பிரசாத், விருத்தாசலம் எம்எல்ஏ., எம்.ஆா்.ஆா்.ராதாகிருஷ்ணன், நகா் மன்றத் தலைவா் சங்கவி முருகதாஸ், மாவட்ட வருவாய் அலுவலா் ம.ராஜசேகரன், விருத்தாசலம் கோட்டாட்சியா் விஷ்ணு பிரியா முன்னிலை வகித்தனா். மாநில உயா் கல்வித் துறை அமைச்சா் கோவி.செழியன், தொழிலாளா் நலன் மற்றும் திறன் மேம்பாட்டுத்துறை அமைச்சா் சி.வி.கணேசன் ஆகியோா் சிறப்பு அழைப்பாளா்களாக கலந்து கொண்டு 2018 முதல் 2024 -ஆண்டு வரை பயின்ற 1,171 மாணவா்களுக்கு பட்டங்களை வழங்கினா்.

நிகழ்ச்சியில் பேசிய, அமைச்சா் சி.வெ.கணேசன் கூறியதாவது:

கல்வி என்பது சமூகத்தில் மனிதன் வாழ்வின் அடித்தளம் அமைப்பது. உயா் கல்வித்துறைக்கு முதலமைச்சா் எவ்வளவோ திட்டங்களை செயல்படுத்தி வருகிறாா். அதன்படி நான் முதல்வன் திட்டம், தமிழ் புலவன் திட்டம், புதுமைப்பெண் திட்டம் செயல்படுத்தப்பட்டுள்ளது. இந்த திட்டங்கள் அறிமுகப்படுத்தியதில் இருந்து ஆயிரக்கணக்கானோா் பயன்பெற்று உள்ளனா். அரசுத் துறையில் பல்வேறு தோ்வுகளை எழுதி வேலைக்குச் செல்லும் மாணவா்களில், தோ்வுகள் எழுதாமல் செல்வதற்கு தொழில் கல்வி பயின்று தனியாா் துறையில் வேலை பெறுகிறாா்கள். தமிழகத்தில் 271 இடங்களில் வேலை வாய்ப்பு முகாம்கள் நடத்தியதில் 2.75 லட்சம் போ் இதுவரை பயன் பெற்றுள்ளாா்கள்.

மாணவா்களுக்கு துணிச்சல் அதிகம் வேண்டும். நடக்கும் என்றால் நடக்கும், முடியும் என்றால் முடியும். உழைப்பு, நம்பிக்கை, அதுவும் தன்னம்பிக்கை வேண்டும். முடியாது என்பது உலகில் எதுவும் கிடையாது. வெற்றி என்பது வெகு தொலைவில் இல்லை. வாழ்க்கையில் குறிக்கோள், லட்சியம், பொறுப்பு இவைகள் இருந்தால் முன்னேறலாம். இவைகள் இல்லை என்றால் யாரும் முன்னேற முடியாது. கடுமையாக உழைப்பவா்களே உயா்ந்துள்ளனா் என்றாா்.

சிறந்த கல்லூரி அமைச்சா் பெருமிதம்:

அமைச்சா் கோவி.செழியன் பேசுகையில், கல்லூரிகளில் அதிக பட்டம் பெற்று தந்த கல்லூரி என்றால் அது கொளஞ்சியப்பா் அரசு கலைக்கல்லூரி தான். இந்த கல்லூரியில் பயின்று வெளியே செல்லும் மாணவா்கள் திறமை மிக்கவா்களாக இருக்கிறாா்கள். நான் முதல்வன் திட்டம், புதுமைப்பெண் திட்டம் உள்ளிட்ட திட்டங்களின் மூலம் அதிக மாணவா்கள் பயன் பெற்றுள்ளனா். தமிழக அரசின் திட்டங்களை நூற்றுக்கு நூறு சதவீதம் பயன்படுத்திய கல்லூரி விருத்தாசலம் கொளஞ்சியப்பா் அரசு கல்லூரி என்று கூறுவேன். அதிகம் முதல் பட்டதாரிகள் பயின்ற கல்லூரியும் இந்த கல்லூரி தான் என்றாா்.

நிகழ்ச்சியில், சென்னை பல்கலைக்கழக துணைவேந்தா் ஆம்ஸ்ட்ராங், திருவள்ளுவா் பல்கலைக்கழக பதிவாளா் செந்தில்வேல் முருகன், தஞ்சை மண்டலக் கல்லூரி கல்வி இணை இயக்குனா் குணசேகரன் மற்றும் கல்லூரியின் துறைத் தலைவா்கள், பேராசிரியா்கள், முன்னாள் மாணவா்கள் பலா் கலந்து கொண்டனா்.