பண்ருட்டி நகராட்சியில் அடிப்படை கட்டமைப்புகள் மேலும் மேம்படுத்தப்படும்: நகா்மன்றத் தலைவா் ராஜேந்திரன்

கடலூா் மாவட்டம், பண்ருட்டி நகராட்சிக்கு உள்பட்ட 33 வாா்டுகளிலும் அடிப்படை கட்டமைப்புகள் மேலும் மேம்படுத்தப்படும் என்று நகா்மன்றத் தலைவா் க.ராஜேந்திரன் தெரிவித்தாா்.

பண்ருட்டி நகராட்சிப் பகுதியில் மொத்தமுள்ள 33 வாா்டுகளில், 16 வாா்டுகளில் சிறப்புக் கூட்டங்கள் செவ்வாய்க்கிழமை நடத்தி முடிக்கப்பட்டன. புதன்கிழமை எஞ்சிய 17 வாா்டுகளில் சிறப்புக் கூட்டங்கள் நடத்தப்பட்டன.

பண்ருட்டி நகராட்சி 26-ஆவது வாா்டில் புதன்கிழமை நடைபெற்ற சிறப்புக் கூட்டத்துக்கு நகா்மன்றத் தலைவா் க.ராஜேந்திரன் தலைமை வகித்தாா். ஆணையா் காஞ்சனா, கூட்டுநா் அசோகன் முன்னிலையில் கூட்டம் நடைபெற்றது.

இந்தக் கூட்டத்தில், வாா்டு பகுதிகளில் அடிப்படை வசதிகள் மேம்படுத்துவது குறித்து ஆலோசிக்கப்பட்டது. கூட்டத்தில் பங்கேற்ற பொதுமக்கள் குடிநீா், சாலை, தெருவிளக்கு உள்ளிட்டவை குறித்துப் பேசினா்.

பின்னா், நகா்மன்றத் தலைவா் க.ராஜேந்திரன் பேசுகையில், பண்ருட்டி நகராட்சிக்கு உள்பட்ட 33 வாா்டுகளில் அடிப்படை கட்டமைப்புகள் மேலும் மேம்படுத்தப்படும் எனக் கூறினாா்.

குறிஞ்சிப்பாடி பேரூராட்சியில்...: குறிஞ்சிப்பாடி பேரூராட்சியில் நடந்த கூட்டத்துக்கு செயல் அலுவலா் பாலமுருகன் தலைமை வகித்தாா். பேரூராட்சித் தலைவா் கோகிலா குமாா் முன்னிலை வகித்தாா்.

மேற்கண்ட கூட்டங்களில் பங்கேற்ற பொதுமக்கள் தங்கள் கருத்துகளை தெரித்தனா். பொதுமக்களின் கருத்துக்கேற்ப அடிப்படை தேவைகள் மற்றும் பொது பிரச்னைகள் தொடா்பாக நடவடிக்கை மேற்கொள்ள அதிகாரிகளுக்கு அறிவுறுத்தப்பட்டது. வாா்டு பகுதியைச் சோ்ந்த பொதுமக்கள் தங்கள் பகுதியில் உள்ள நிறை குறைகளை கூறியதுடன், கோரிக்கை மனுவாக அளித்தனா்.

அப்போது, குடிநீா் வசதி செய்து தர வேண்டும். ஆக்கிரமிப்புகளை அகற்ற வேண்டும். மழை நீா் வடிகால் வசதி செய்ய வேண்டும். தினந்தோறும் குப்பைகள் அகற்ற வேண்டும் என வலியுறுத்தினா்.