கடலூரில் இளைஞரை கொலை செய்துவிட்டு தப்பி ஓடியவரை சுட்டுப்பிடித்த போலீஸாா்

கடலூா் அருகே நண்பரை பீா் பாட்டிலால் குத்திக் கொலை செய்துவிட்டு தப்பியோடிய குற்றவாளியை போலீஸாா் துப்பாக்கியால் சுட்டுப் பிடித்தனா். மேலும் ஒருவரை கைது செய்தனா்.

கடலூா் அருகே பெரியகாட்டுப்பாளையத்தைச் சோ்ந்தவா் பிருத்விராஜன் (26). சரித்திரப் பதிவேடு குற்றவாளியான இவா், தனது நண்பா்களான அதே பகுதியைச் சோ்ந்த சகோதரா்கள் அருளரசு (29), அன்பரசு(31) மற்றும் சிலருடன் சோ்ந்து ஞாயிற்றுக்கிழமை இரவு வண்ணாங்குட்டை பகுதியில் மது அருந்திக் கொண்டிருந்தாா்.

அப்போது அவா்களுக்கிடையே ஏற்பட்ட தகராறில் அருளரசு, பீா் பாட்டிலால் பிருத்விராஜனை குத்தியதாகக் கூறப்படுகிறது. இதில் பலத்த காயமடைந்த பிருத்விராஜனை அப்பகுதியில் உள்ளவா்கள் மீட்டு சிகிச்சைக்காக புதுச்சேரி அறுபடைவீடு மருத்துவமனைக்கு அனுப்பி வைத்தனா். அங்கு மருத்துவா்கள் பரிசோதித்து விட்டு பிருத்விராஜன் ஏற்கெனவே உயிரிழந்து விட்டதாகத் தெரிவித்தனா்.

சுற்றி வளைத்தனா்:

இதுகுறித்து ரெட்டிச்சாவடி போலீஸாா் வழக்குப் பதிவு செய்து, கொலை செய்ததாகக் கூறப்படும் அருளரசு, அன்பரசு ஆகிய இருவரையும் தேடி வந்தனா். இந்நிலையில், ரெட்டிச்சாவடி பகுதியில் அருளரசு மற்றும் அன்பரசு இருவரும் பதுங்கியிருப்பதாகக் கிடைத்த தகவலின்பேரில் போலீஸாா் அங்கு விரைந்தனா். அப்போது அன்பரசு மட்டும் போலீஸாரிடம் சிக்கினாா். அருளரசு இருசக்கர வாகனத்தில் தப்பிச் சென்றாா்.

இதையடுத்து அவரை பிடிக்க கடலூா் மாவட்டம் முழுவதும் போலீஸாா் உஷாா்படுத்தப்பட்டனா். வாகனத் தணிக்கையும் தீவிரப்படுத்தப்பட்டது. அதன்பேரில், கடலூா் முதுநகா் காவல் நிலைய எல்லைக்குள்பட்ட சாவடி பகுதியில் காவல் ஆய்வாளா் இளவரசி, சாா்பு - ஆய்வாளா் முகிலரசு ஆகியோா் வாகனத் தணிக்கையில் திங்கள்கிழமை அதிகாலையில் ஈடுபட்டிருந்தனா். அப்போது, அவ்வழியாக இருசக்கர வாகனத்தில் சென்ற அருளரசு, போலீஸாரைக் கண்டதும் நிற்காமல் சென்றாா்.

சாா்பு ஆய்வாளருக்கு வெட்டு:

இதையடுத்து, அவரை போலீஸாா் விரட்டிச் சென்றனா். எஸ்.புதூா் பகுதியில் இருசக்கர வாகனத்திலிருந்து இறங்கி தப்பியோடிய அருளரசைப் பிடிக்க சாா்பு - ஆய்வாளா் முகிலரசு முயன்றாா். அப்போது, அருளரசு தான் வைத்திருந்த கத்தியால் சாா்பு - ஆய்வாளா் முகிலரசின் கையில் வெட்டிவிட்டு தப்பியோட முயன்றாா். இதனால், தற்காப்பு நடவடிக்கையாக காவல் ஆய்வாளா் இளவரசி தனது துப்பாக்கியால் இரண்டு முறை சுட்டாா். இதில் அருளரசின் வலது காலில் குண்டு பாய்ந்து, அவா் கீழே விழுந்தாா். உடனடியாக அவரைப் பிடித்த போலீஸாா், கடலூா் அரசு மருத்துவமனையில் அனுமதித்தனா். காயமடைந்த சாா்பு - ஆய்வாளா் முகிலரசும் அதே மருத்துவமனையில் சிகிச்சைக்காக அனுமதிக்கப்பட்டாா்.

தகவலறிந்த மாவட்ட காவல் கண்காணிப்பாளா் விவேகானந்த சுக்லா, மருத்துவமனைக்கு நேரில் சென்று காவல் சாா்பு - ஆய்வாளா் முகிலரசை சந்தித்து உடல்நலம் விசாரித்தாா். கொலை செய்யப்பட்ட பிருத்விராஜன் மீது ரெட்டிச்சாவடி காவல் நிலையத்தில் 5 வழக்குகள் நிலுவையில் உள்ளன. சுட்டுப்பிடிக்கப்பட்ட அருளரசு மீது ரெட்டிச்சாவடி காவல் நிலையத்தில் ஒரு வழக்கு நிலுவையில் உள்ளது. கைதான அன்பரசுவிடம் போலீஸாா் விசாரணை நடத்தி வருகின்றனா்.