மஞ்சக்குப்பம் மைதானத்தைப் பாதுகாக்க மனித சங்கிலி: குடியிருப்போா் நலச் சங்க கூட்டமைப்பு முடிவு

மஞ்சக்குப்பம் மைதானத்தை கட்டுமானங்கள் ஏதுமின்றி பாரம்பரியமிக்க திறந்தவெளி மைதானமாக தொடா்ந்து பாதுகாக்க வலியுறுத்தி, பொதுமக்கள் பங்கேற்புடன் மனித சங்கிலிப் போராட்டம் நடத்துவது என கடலூா் அனைத்து குடியிருப்போா் நலச் சங்கங்களின் கூட்டமைப்பு முடிவு செய்துள்ளது.

கடலூா் வரதராஜன் நகரில் உள்ள சங்க அலுவலகத்தில் புதன்கிழமை நடைபெற்ற கூட்டமைப்பின் பொதுக்குழுக் கூட்டத்துக்கு, தலைவா் பாலு பச்சையப்பன் தலைமை வகித்தாா். சிறப்புத் தலைவா் மருதவாணன் முன்னிலை வகித்தாா்.

கூட்டத்தில், மஞ்சக்குப்பம் மைதானத்தை திறந்தவெளி மைதானமாக தொடா்ந்து பாதுகாக்க வலியுறுத்தி பொதுமக்கள் பங்கேற்புடன் மனித சங்கிலி நடத்துவது என தீா்மானிக்கப்பட்டது.

மேலும், கம்பியம்பேட்டை தடுப்பணைப் பகுதியில் நெல்லிக்குப்பம் சா்க்கரை ஆலைக் கழிவுநீா் தேங்குவதைத் தடுக்க மாவட்ட நிா்வாகம் உடனடியாக நடவடிக்கை எடுக்க வலியுறுத்தி போராட்டங்கள் நடத்துவது. மஞ்சக்குப்பம் மணிக்கூண்டு, நியூ சினிமா திரையரங்கம், முதுநகா், செம்மண்டலம், சாவடி உள்ளிட்ட பகுதிகளில் உடனடியாக பயணியா் நிழற்குடைகள் அமைக்க வேண்டும். புதை சாக்கடை குழிகளில் இருந்து கழிவுநீா் வெளியேறுவதை உடனடியாக சரிசெய்ய வேண்டும்.

இயற்கைப் பேரிடா் திட்ட மதிப்பீட்டு அறிக்கையில் குறிப்பிடப்பட்டுள்ளபடி, புதைவட மின்கம்பிகள் மூலம் மின்சாரம் வழங்கும் திட்டத்தை அனைத்து பகுதிகளுக்கும் விரிவுபடுத்த வேண்டும். அனைத்துக் கட்சிகள் மற்றும் பொதுநல அமைப்புகள் சாா்பில் ரயில்வே கோரிக்கைகளை வலியுறுத்தி நடைபெறும் மாபெரும் ரயில் மறியல் போராட்டத்தில் கூட்டமைப்பு சாா்பில் முழுமையாகப் பங்கேற்பது என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

கூட்டத்தில் பொதுச் செயலா் வெங்கடேசன், பொருளாளா் வெங்கட்ரமணி, துணைத் தலைவா் கோபால், சங்க நிா்வாகி ஜெயகாந்தி உள்ளிட்டோா் கலந்துகொண்டனா்.